Qasym-Jomart Toqaev pen Masýd Pezeshkıan Qazaqstan-Iran bıznes forýmyna qatysty
ASTANA. KAZINFORM — Qasym-Jomart Toqaev qazaq-ıran qarym-qatynasyn nyǵaıtýǵa zor úles qosyp kele jatqan Prezıdent Masýd Pezeshkıanǵa alǵys aıtty. Bul týraly Aqordanyń baspasóz qyzmeti habarlady.
Memleket basshysy eki el arasyndaǵy alys-beristiń qarqyny joǵary ekenin, búgingi is-shara ekonomıka jáne ınvestıtsııa salasyndaǵy yntymaqtastyqty bekemdeı túsetinin jetkizdi.
— Byltyr saýda-sattyǵymyz 340 mıllıon dollardan asqan bolatyn. Bıyl bul kórsetkish birneshe ese artady degen boljam bar. Biz elderimiz arasyndaǵy taýar aınalymyn aıtarlyqtaı ulǵaıtyp, eń aldymen, 1 mıllıard dollarǵa, sodan keıin ekinshi kezeńde 2 mıllıard dollarǵa deıin jetkizýge kelistik. Buǵan áleýetimiz tolyq jetedi. Osy oraıda, Tegeran qalasynda Qazaqstannyń Saýda úıin ashý jónindegi bastamanyń mańyzy zor. Bul bastama otandyq ónimderdi Iran naryǵyna júıeli túrde jetkizip turýǵa múmkindik beredi. Investıtsııa salasyndaǵy baılanysymyz kúsheıip keledi. Sońǵy 20 jylda Iran Islam Respýblıkasy Qazaqstanǵa 226 mıllıon dollardan astam ınvestıtsııa saldy. Qazir elimizde Irannyń iskerlik qaýymdastyǵy ashqan 350-den astam kásiporyn tabysty jumys istep jatyr. Búgingi basqosý osyndaı kásiporyndardyń qataryn kóbeıtýge septigin tıgizedi dep senemiz, — dedi Qasym-Jomart Toqaev.
Shara sońynda Memleketter basshylary Qazaqstan-Iran bıznes forýmyna qatysýshylarmen sýretke tústi.
Buǵan deıin Aqordada Memleket basshysy Qasym-Jomart Toqaev elimizge resmı saparmen kelgen Iran Islam Respýblıkasynyń Prezıdenti Masýd Pezeshkıandy qarsy alǵanyn jazǵan edik.
Keıinnen Qasym-Jomart Toqaev pen Masýd Pezeshkıan shaǵyn quramda kelissóz júrgizdi.
Toqaev Qazaqstan men Iran arasyndaǵy yntymaqtastyqtyń bolashaǵy óte zor ekenin alǵa tartty.
Óz kezeginde Iran prezıdenti Qazaqstanmen saýda-sattyqty damytýǵa múddeli ekenin aıtty.
Kazinform-nyń analıtıkalyq sholýshysy Astana men Tegeran arasyndaǵy kelissózdiń astaryna úńilip kórgen edi.