Qasym-Jomart Toqaev pen Itshak Gertsog shaǵyn quramda kelissóz júrgizdi
ASTANA. KAZINFORM — Memleket basshysy Qasym-Jomart Toqaev pen Izraıl Prezıdenti Itshak Gertsog shaǵyn quramda kelissóz júrgizdi. Qasym-Jomart Toqaev Itshak Gertsogpen elimizdiń tórinde júzdeskenine qýanyshty ekenin aıtty, dep habarlaıdy Aqordanyń baspasóz qyzmeti.
— Eń áýeli, eki el arasyndaǵy qarym-qatynastyń irgesin qalaýǵa Sizdiń ákeńiz, Izraıl Memleketiniń burynǵy Prezıdenti Haım Gertsogtyń erekshe eńbek sińirgenin atap ótkim keledi. 1992 jyldan beri qos halyq ortasynda tyǵyz dostyq baılanys ornady. Ózara yntymaqtastyqta, ásirese, ekonomıka jáne saıası baǵyttarda eleýli tabysqa qol jetkizdik. Elimiz Ibrahım kelisimderine qosylý týraly sheshim qabyldady. Bul qadam Taıaý Shyǵys elderi men Izraıl arasyndaǵy qarym-qatynastyń qalpyna kelýine Qazaqstannyń da úles qosýǵa daıyn ekenin kórsetedi. Búgin biz ózara ekonomıkalyq baılanystarymyzǵa qatysty kóptegen máseleni talqylaımyz. Óıtkeni ekijaqty yntymaqtastyqtyń áleýeti zor. Bul múmkindikti meılinshe paıdalaný kerek, — dedi Memleket basshysy.
Izraıl Prezıdenti 1993 jyly Qazaqstanǵa sapar jasaǵan ákesi Haım Gertsogtyń izin jalǵap Aqordaǵa kelgeni úshin qýanyshty ekenin jetkizdi.
— Qazaqstanǵa únemi kelgim keletin edi. Muny shyn júrekten aıtyp otyrmyn. Óıtkeni qazaq jeriniń kórkem tabıǵaty men qazaq halqynyń keremet mádenıeti týraly kóp estidim. Menimen birge ózara seriktestigimizge, ásirese, joǵary tehnologııalar salasyndaǵy yqpaldastyqqa tyń serpin beretin sarapshylar keldi. Álem jańa dáýirge qadam basqan kezeńde elderimiz arasyndaǵy yntymaqtastyqtyń áleýeti orasan zor, — dedi Itshak Gertsog.
Sonymen qatar Izraıl Prezıdenti Qazaqstannyń Ibrahım kelisimderine qosylý jáne Beıbitshilik keńesiniń jumysyna atsalysý týraly sheshimin qoldady.
Osyǵan deıin Aqordada elimizge resmı saparmen kelgen Izraıl Prezıdenti Itshak Gertsogty saltanatty qarsy alý rásimi ótkenin jazdyq.
