Qasym-Jomart Toqaev pen Iraklıı Kobahıdze kelissóz júrgizdi
ASTANA.KAZINFORM – Resmı delegatsııa músheleriniń qatysýymen ótken kelissóz barysynda eki eldiń saıası, saýda-ekonomıkalyq jáne mádenı-gýmanıtarlyq yntymaqtastyǵyn keńeıtý perspektıvasy talqylandy, dep habarlaıdy Aqordanyń baspasóz qyzmeti.
Memleket basshysy Qazaqstannyń Ońtústik Kavkazdaǵy ýaqyt tezinen ótken senimdi seriktesi Grýzııamen aradaǵy dostyq qatynastardy baǵalaıtynyn atap ótti.
– Bizdiń elderimizdi tarıhı tamyrlastyq, ortaq mádenı qundylyqtar men halyqtarymyzdyń arasyndaǵy berik baılanystar biriktiredi. Bul – ózara seriktestigimizdiń negizi. Biz jańa ǵana nátıjeli pikir almasyp, ekijaqty yntymaqtastyqty odan ári damytýǵa nıetti ekenimizdi rastadyq, – dedi Qasym-Jomart Toqaev.
Prezıdent búgin qol qoıylatyn Strategııalyq seriktestik ornatý jónindegi birlesken málimdeme qazaq-grýzın qarym-qatynasyn jańa ári sapaly deńgeıge kóteretinine senim bildirdi.
– Saýda-ınvestıtsııalyq yqpaldastyq eki el baılanysynyń ózegi sanalady. Jahandaǵy turaqsyzdyqqa qaramastan taýar aınalymyn ulǵaıtýǵa múmkindik mol. Qazaqstan Grýzııa ekonomıkasyna jarty mıllıard dollardan astam ınvestıtsııa saldy. Ári atalǵan eldiń iri ınvestorlarynyń qataryna kiredi. Memleketterimiz energetıka sektorynda tabysty yntymaqtastyqty jolǵa qoıdy. Biz Baký – Tbılısı – Djeıhan qubyrymen munaı tasymaly kólemin ulǵaıtýǵa nıettimiz. Saýda-ekonomıkalyq yntymaqtastyq jónindegi úkimetaralyq komıssııa aıasynda belsendi jumys atqarylyp jatyr. Búgingi kezdesý keleshektegi jańa basymdyqtardy aıqyndaýǵa septigin tıgizedi dep úmittenemin, – dedi Memleket basshysy.
Iraklıı Kobahıdze Qasym-Jomart Toqaevtyń kóshbasshylyǵymen Qazaqstan damýdyń dańǵyl jolyna túskenine toqtaldy.
– Qazaqstan – Ortalyq Azııa aımaǵyndaǵy senimdi seriktesimiz. Oraıly sátte Sizdi jańa Konstıtýtsııanyń qabyldanýymen quttyqtaımyn. Bul Sizdiń tegeýrindi basshylyǵyńyzdy jáne Qazaqstannyń ornyqty damýyn kórsetedi. Ekijaqty seriktestikti jańa strategııalyq deńgeıge kóterý úkimetterimiz ben halyqtarymyzdyń arasyndaǵy yntymaqtastyqqa jol ashady. Sizge Strategııalyq seriktestik týraly birlesken málimdeme qabyldaǵanyńyz úshin alǵys aıtamyn. Sondaı-aq biz Qazaqstanmen saıası dıalog bolsyn, ınstıtýtsıonaldyq jáne úkimettik almasýlar bolsyn, túrli deńgeıdegi tyǵyz yqpaldastyqty joǵary baǵalaımyz. Munyń bári qarym-qatynasymyzdy ilgerilete túsedi, – dedi Grýzııa Premer-mınıstri.
Qazaqstan men Grýzııa strategııalyq seriktestikti jańa deńgeıge kótermek.
