Qasym-Jomart Toqaev pen Frıdrıh Merts BAQ ókilderine birlesken málimdeme jasady
ASTANA. KAZINFORM — Memleket basshysy búgingi kelissózder eki eldiń baılanysyn odan ári nyǵaıtýǵa jol ashatynyna senim bildirip, bul saparǵa erekshe mán beretinin aıtty. Bul týraly Aqordanyń baspasóz qyzmeti habarlady.
– Germanııa – saıası yqpaly zor, áleýeti myqty jáne halyqaralyq abyroı-bedeli joǵary memleket. Ekonomıka, ǵylym, tehnologııa jáne basqa da saladaǵy orasan jetistikterińiz – sonyń jarqyn dáleli. Osy sátti paıdalanyp, qurmetti Kantsler myrza, Sizdi jáne barsha otandasyńyzdy kele jatqan Germanııanyń birligi kúnimen shyn júrekten quttyqtaımyn! Bul Germanııany damýdyń jańa dáýirine bastaǵan, tutas Eýropanyń ósip-órkendeýine tyń serpin bergen tarıhı kún ekeni sózsiz. Men dostas german halqynyń odan ári kórkeıe berýine shynaıy tilektestigimdi bildiremin, – dedi Qasym-Jomart Toqaev.
Prezıdent Germanııany Qazaqstannyń Eýropadaǵy senimdi strategııalyq seriktesi ári elimizdiń Táýelsizdigin alǵashqylardyń biri bolyp tanyǵan memleket dep atady.
– Kelesi jyly eki memlekettiń arasynda dıplomatııalyq qarym-qatynas ornaǵanyna 35 jyl tolady. Sodan beri bizdiń seriktestigimiz barlyq deńgeıde dáıekti túrde damyp kele jatyr. Atap aıtqanda, saýda-ekonomıka, ınvestıtsııa jáne mádenı-gýmanıtarlyq saladaǵy baılanystarymyz nyǵaıa tústi. Tıisti sharttyq-quqyqtyq negiz qalyptasty. Halyqaralyq uıymdar aıasyndaǵy yqpaldastyǵymyz da keńeıdi. Ózara qurmet pen qoldaýǵa negizdelgen yntymaqtastyǵymyz aldaǵy ýaqytta da tabysty bolady dep senemin, – dedi Qasym-Jomart Toqaev.
Aıta ketelik Qasym-Jomart Toqaev Germanııaǵa resmı saparmen bardy. Sonymen qatar Qasym-Jomart Toqaev pen Frank-Valter Shtaınmaıer Birlesken deklaratsııa qabyldady. Sondaı-aq Prezıdent Qasym-Jomart Toqaev Kantsler Frıdrıh Mertspen kelissóz júrgizdi.
