Qasym-Jomart Toqaev pen Emmanıýel Makron BAQ ókilderi úshin málimdeme jasady
Ekijaqty kelissózderden keıin Memleket basshysy Qasym-Jomart Toqaev pen Frantsııa Prezıdenti Emmanıýel Makron buqaralyq aqparat quraldarynyń ókilderi úshin birlesken málimdeme jasady, dep habarlaıdy Kazinform Aqordanyń baspasóz qyzmetine silteme jasap.
Prezıdent eń aldymen, shaqyrýyn qabyl alyp, Qazaqstanǵa resmı saparmen kelgeni úshin Emmanıýel Makronǵa alǵys aıtty. Sondaı-aq Frantsııany Qazaqstannyń Eýropadaǵy óte mańyzdy ári senimdi seriktesi retinde atap ótti.
«Bıyl eki el arasyndaǵy Strategııalyq áriptestik týraly kelisimge qol qoıylǵanyna 15 jyl toldy. Dostyq pen ózara qoldaýǵa negizdelgen osy yntymaqtastyqty odan ári nyǵaıtý – ortaq mindetimiz. Biz birge kúsh jumyldyryp, kózdegen maqsatqa jetemiz. Men buǵan kámil senemin. Sondyqtan búgingi sapardyń mán-mańyzy aıryqsha», - dedi Qasym-Jomart Toqaev.
Memleket basshysy Prezıdent Emmanıýel Makronmen mazmundy kelissóz júrgizip, ekijaqty baılanysty nyǵaıtý jóninde naqty kelisimderge qol jetkizgenine nazar aýdardy.
«Frantsııa – Qazaqstannyń eń iri saýda seriktesiniń biri. Bıylǵy segiz aı ishinde saýda-sattyq kólemi ótken jylmen salystyrǵanda 21 paıyzǵa ósti. ıAǵnı 2,7 mıllıard dollarǵa jetti. Sondaı-aq Frantsııa negizgi sheteldik ınvestorlarymyzdyń qataryna kiredi. Sońǵy 15 jylda Frantsııadan Qazaqstanǵa 18,7 mıllıard dollarǵa jýyq ınvestıtsııa tartyldy. Búginde biz energetıka, atom ónerkásibi, taý-ken, hımııa, mashına jasaý, qurylys zattaryn óndirý, aeroǵarysh jáne farmatsevtıka salalarynda mańyzdy jobalardy júzege asyryp kelemiz. Elimizde Alstom, Total Energies, Orano, Vicat sııaqty 170-ten astam frantsýz kompanııasynyń tabysty jumys isteýi – sonyń aıqyn dáleli», - dedi Prezıdent.
Memleket basshysynyń aıtýynsha, kelissózder barysynda saýda, ekonomıka jáne ınvestıtsııa salalaryndaǵy yqpaldastyqtyń aýqymyn keńeıtýge basa mán berilip, shıkizat, aýyl sharýashylyǵy, kólik, logıstıka, jeńil ónerkásip, densaýlyq saqtaý, ınnovatsııa, qarjy jáne basqa da sektorlarda tyń jobalardy qolǵa alý mańyzdy ekeni atap ótilgen.
«Bul, ásirese, qazirgi kúrdeli geosaıası jáne geoekonomıkalyq ahýal kezinde asa ózekti. Osy rette Strategııalyq mıneraldar salasyndaǵy yntymaqtastyq nıeti týraly deklaratsııaǵa qol qoıyldy. Sondaı-aq Boehringer Ingelheim,Total Energies, Alstom kompanııalarymen kelisimderge qol jetkizdik. Oǵan jańa ǵana ózderińiz kýá boldyńyzdar. Bul kelisimder eki el úshin de paıdaly bolmaq. Josparlanǵan sharalardy tıimdi iske asyrý maqsatynda birlesken ınvestıtsııalyq jobalardy mınıstrlikter deńgeıinde ilgeriletý kerek. Ol úshin arnaýly jumys tobyn qurýdy usyndym», – dedi Prezıdent.
Sonymen qatar ekijaqty kelissózder barysynda «jasyl» ekonomıkaǵa kóshýge jáne klımattyń ózgerýine qatysty máselelerge nazar aýdarylǵan. Qasym-Jomart Toqaev Emmanıýel Makronǵa eki eldiń múddesine saı keletin birqatar naqty usynys aıtqanyn, elimiz Frantsııanyń «One Planet Summit» bastamasy aıasynda birlese jumys isteýge daıyn ekenin naqtylaǵanyn málimdedi.
Buǵan qosa, prezıdentter mádenı-gýmanıtarlyq saladaǵy yntymaqtastyqtyń mańyzdy ekenin eskerip, bilim jáne ǵylym baǵyttaryndaǵy jobalardy júzege asyrý jónindegi ýaǵdalastyqqa qol jetkizgen. Memleket basshysy frantsýz mektepterin ashýǵa, frantsýz tilin úıretýge, akademııalyq baılanysty arttyrýǵa baǵyttalǵan birqatar kelisimge qol qoıylǵanyn aıtty.
Eki el basshylary aımaqtyq jáne jahandyq kún tártibindegi ózekti máseleler jóninde pikir almasyp, álemdegi túrli saıası shıelenister men túıtkilder beıbit jáne dıplomatııalyq jolmen sheshilýge tıis degen baılamǵa kelgen.
Óz kezeginde Frantsııa Prezıdenti Emmanıýel Makron Qazaqstanǵa saparmen kelýge shaqyrǵany úshin Prezıdentke alǵys aıtyp, eki eldiń yntymaqtastyǵyn odan ári keńeıtý qajet ekenin atap ótti. Sondaı-aq Qazaqstan men Frantsııanyń ustanymdary kóptegen máselelerde sáıkes keletinine nazar aýdardy.
«Sizdiń elińizdiń róli men geografııalyq ornalasýy, sondaı-aq onyń aýmaǵynyń úlkendigi biz úshin óte mańyzdy. Sondyqtan búgin ekonomıkalyq yntymaqtastyǵymyz jan-jaqty talqylandy. Búgin qol qoıylǵan qujattar – osynyń aıǵaǵy. Prezıdent myrza, Siz Qazaqstanda jumys istep jatqan frantsýz kásiporyndarynyń mańyzyna arnaıy toqtaldyńyz. Frantsýz kompanııalary saýda jáne energetıka salalarynda uzaqmerzimdi seriktestik ornatty. Kompanııalarymyzdyń basqa da salalarda birlese jumys istegenin qalaımyz. Yntymaqtastyqtyń negizgi baǵyttary belgili. Olar – energetıka jáne aeroǵarysh ónerkásibi salalary», - dedi Emmanıýel Makron.
Sonymen qatar Frantsııa Prezıdenti Qazaqstannyń álemdegi azyq-túlik qaýipsizdigin qamtamasyz etý isinde mańyzdy ról atqaratynyna toqtaldy.
«Kompanııalarymyz bul iske oń septigin tıgize alatynyna senimdimin. Biz naryqty nyǵaıtýǵa úles qosa alamyz. Bul rette aýsylǵa qarsy vaktsına óndirisi jobasyn júzege asyrý týraly mańyzdy kelisimge qol qoıyldy. Sondaı-aq densaýlyq saqtaý salasynda ornatylǵan seriktestiktiń keleshegi zor. Prezıdent myrza, Siz halyqtarymyz arasyndaǵy baılanystardyń mańyzdy ekenin aıttyńyz. Biz bilim berý baǵytyndaǵy yntymaqtastyqqa qatysty birqatar kelisimderge qol qoıdyq», – dedi Frantsııa Prezıdenti.
Kelissózder nátıjesinde Qazaqstan men Frantsııa basshylary Birlesken málimdeme jasady jáne eki eldiń resmı delegatsııa músheleri birqatar qujatqa qol qoıdy.
