12:23, 30 Mamyr 2025 | GMT +5
Qasym-Jomart Toqaev pen Djordja Melonı kelissóz júrgizdi
ASTANA. KAZINFORM — Memleket basshysy Qasym-Jomart Toqaev Aqordada Qazaqstanǵa resmı saparmen kelgen Italııa Premer-mınıstri Djordja Melonımen kelissóz júrgizdi. Bul týraly Aqorda málim etti.
– Sizdiń bul saparyńyz – ekijaqty yntymaqtastyǵymyzdaǵy aıtýly oqıǵa. Biz ózara baılanysqa, dostyq pen senimge qurylǵan qarym-qatynasqa aıryqsha mán beremiz. Italııa Qazaqstannyń álemdegi saýda seriktesteriniń úshtigine kiredi jáne Eýropadaǵy iri áriptesimiz. Bul beker emes. Ekijaqty yntymaqtastyqtyń joǵary qarqynyn saqtaýymyz qajet. Sizdiń saparyńyz qos el arasyndaǵy kópqyrly yqpaldastyqty damytýǵa tyń serpin beretini sózsiz, – dedi Qazaqstan Prezıdenti.
– Elińizge shaqyryp, qonaqjaılyq tanytqanyńyz jáne Astana halyqaralyq forýmynda sóz sóıleýge múmkindik jasaǵanyńyz úshin taǵy da alǵys aıtamyn. Bul forým dıalog úshin mańyzdy alańdardyń birine aınalyp keledi. Biz Qazaqstandy Italııanyń strategııalyq seriktesi, al Ortalyq Azııa óńirin strategııalyq turǵydan mańyzdy toǵyz joldyń toraby retinde qarastyramyz. Bizge dıalog qajet. Muny Ózińiz de jaqsy túsinesiz. Qazaqstan – Italııanyń kóptegen sala boıynsha mańyzdy áriptesi. Eki el arasyndaǵy yntymaqtastyq tabysty damyp keledi. Áıtse de, keshe aıtqanymdaı, energetıkadan bastap mádenıetke deıin, ýnıversıtetterdiń tájirıbe almasýy, halyqtar arasyn jaqyndatý baǵyttarynda budan da joǵary nátıjege qol jetkizýge múmkindik bar, – dedi Italııa Premer-mınıstri.
Kezdesýde saýda-ekonomıkalyq jáne ınvestıtsııalyq yqpaldastyqty keńeıtý perspektıvasy talqylandy.
Buǵan deıin habarlanǵandaı, Qasym-Jomart Toqaev Aqordada Djordja Melonıdi qarsy aldy.