Qasym-Jomart Toqaev pen Belgııa Koroli birlesken málimdeme jasady

Joǵary mártebeli Qazaqstan Respýblıkasynyń Prezıdenti Qasym-Jomart Toqaevtyń shaqyrýy boıynsha Asa mártebeli Belgııalyqtar Koroli Fılıpp pen Asa mártebeli Patshaıym Matılda 2026 jylǵy 11 — 14 qazanda Qazaqstanǵa memlekettik saparmen keldi.

Joǵary mártebeli Qazaqstan Respýblıkasynyń Prezıdenti Qasym-Jomart Toqaev pen Asa mártebeli Belgııalyqtar Koroli Fılıpp Qazaqstan-Belgııa qarym-qatynasynyń qazirgi jaı-kúıi men perspektıvasyn jan-jaqty talqylady, sondaı-aq óńirlik jáne halyqaralyq kún tártibindegi ózekti máseleler boıynsha pikir almasty.

Qazaqstan men Belgııa arasyndaǵy dostyq qatynastardy teń quqyqty jáne ózara tıimdi yntymaqtastyq rýhynda odan ári damytýǵa jáne tereńdetýge umtylysyn rastaı otyryp, taraptar:

1. Qazaqstan men Belgııa arasyndaǵy ekijaqty yntymaqtastyq tyǵyz dıalog jáne ózara senim men qurmet aıasynda damyp kele jatqanyn atap ótti.

2. 2015 jylǵy 21 jeltoqsandaǵy bir taraptan Qazaqstan Respýblıkasy men ekinshi taraptan Eýropalyq Odaq jáne oǵan múshe memleketter arasyndaǵy Keńeıtilgen áriptestik jáne yntymaqtastyq týraly kelisim sheńberinde tyǵyz yqpaldastyqty jalǵastyrýǵa daıyn ekenin bildirdi.

3. Qazaqstanda belgııalyq bıznestiń ornyqty qatysýyn jáne ózara saýda men ınvestıtsııalardy odan ári ulǵaıtý úshin aıtarlyqtaı áleýet bar ekenin qanaǵattanýshylyqpen atap ótti.

4. «Qazaqstan — Belgııa» iskerlik keńesiniń qyzmetin jáne memlekettik sapar aıasynda onyń tórtinshi otyrysynyń ótkizilýin eki eldiń isker toptary arasyndaǵy baılanystardy damytýdyń mańyzdy tetigi retinde quptady.

5. asa mańyzdy mıneraldar, munaı-hımııa, ónerkásip, mashına jasaý, kólik-logıstıka jáne jańartylatyn energetıka salalaryndaǵy yntymaqtastyqty odan ári damytýdyń mańyzdy ekenin rastady.

6. asa mańyzdy mıneraldar salasyndaǵy baılanystardyń strategııalyq mańyzyn atap ótip, memlekettik sapar aıasynda Asa mańyzdy mıneraldar jónindegi dóńgelek ústeldiń ótkizilýin quptady.

7. kólik-logıstıka yntymaqtastyǵyn odan ári damytýdyń jáne Eýropa men Azııa arasyndaǵy ózara baılanysty arttyrýdyń mańyzyn atap ótip, Transkaspıı halyqaralyq kólik baǵytynyń Azııa men Eýropa arasyndaǵy senimdi ári ornyqty kólik qatynasy retinde ósip kele jatqan rólin atap kórsetti.

8. eki eldiń ornyqty ekonomıkalyq damýy men básekege qabilettiligi úshin tsıfrlandyrýdyń, jasandy ıntellekt pen ınnovatsııalardyń mańyzy artyp kele jatqanyn atap ótti.

9. jasandy ıntellekt, úlken derekter, bultty tehnologııalar, sýperkompıýter ınfraqurylymy jáne derekterdi óńdeý ortalyqtary salalaryndaǵy yntymaqtastyqty damytýǵa múddeli ekenin aıtty.

10. aýyl sharýashylyǵy salasyndaǵy yntymaqtastyqtyń aıtarlyqtaı áleýetin atap ótip, aýyl sharýashylyǵy ónimderiniń ózara saýdasyn keńeıtýge, tamaq ónerkásibin damytýǵa jáne zamanaýı agrotehnologııalardy engizýge járdemdesý nıetin jetkizdi.

11. memlekettik sapar aıasynda Qazaqstan-Belgııa rektorlar forýmynyń ótkizilýin quptap, birlesken bilim berý baǵdarlamalaryn, akademııalyq utqyrlyqty, birlesken ǵylymı zertteýlerdi jáne ýnıversıtetter men ǵylymı ortalyqtar arasyndaǵy áriptestikti damytýǵa qoldaý bildirdi.

12. densaýlyq saqtaý salasyndaǵy yntymaqtastyqty nyǵaıtýdyń, sonyń ishinde 1978 jylǵy alǵashqy medıtsınalyq-sanıtarııalyq kómek jónindegi Almaty deklaratsııasy men 2018 jylǵy Astana deklaratsııasynyń qaǵıdattary negizinde Dúnıejúzilik densaýlyq saqtaý uıymynyń alǵashqy medıtsınalyq-sanıtarııalyq kómek jónindegi Jahandyq koalıtsııasy sheńberinde alǵashqy medıtsınalyq-sanıtarııalyq kómektiń (AMSK) rólin kúsheıtýdiń, sondaı-aq 2026 jylǵy 14 qazanda Almaty qalasynda ótetin «Almaty deklaratsııasynyń 50 jyldyǵy: bolashaq urpaq úshin myqty alǵashqy medıtsınalyq-sanıtarııalyq kómek qalyptastyrý» konferentsııasynyń qorytyndylary boıynsha qol jetkiziletin ýaǵdalastyqtarǵa sáıkes birlesken bastamalardy iske asyrýdyń mańyzyn rastady.

13. dinaralyq jáne mádenıetaralyq dıalogty odan ári nyǵaıtýdyń, beıbitshilik mádenıetin, ózara qurmet pen toleranttylyqty ilgeriletýdiń mańyzdy ekenin rastady.

14. klımattyń ózgerýine, sý resýrstarynyń tapshylyǵyna jáne qorshaǵan ortanyń tozýyna qarsy kúrestegi birlesken kúsh-jigerdiń, sondaı-aq ornyqty damýdy ilgeriletýdiń mańyzyn atap ótti.

15. 2024 jylǵy 7 qarashadaǵy Qazaqstan men Benılıýks elderi arasyndaǵy qyzmettik pasport ıelerin vızalyq talaptardan bosatý týraly kelisimge ózgerister engizý jónindegi Hattamanyń kúshine enýin quptady.

16. 2027 jyly Qazaqstan Respýblıkasy men Belgııa Koroldigi arasyndaǵy dıplomatııalyq qatynastardyń ornaǵanyna 35 jyl tolýyn merekeleýge arnalǵan is júzindegi nátıjelerdiń biri retinde dıplomatııalyq ókildikter, halyqaralyq uıymdar janyndaǵy ókildikter jáne konsýldyq mekemeleri qyzmetkerleriniń otbasy músheleriniń aqyly eńbek qyzmeti týraly ekijaqty kelisim boıynsha kelissózderdi aıaqtaýǵa jáne oǵan qol qoıýǵa kúsh salatyn bolady.

17. kópjaqtylyqqa, halyqaralyq quqyq qaǵıdattaryna jáne halyqaralyq beıbitshilik pen qaýipsizdikti qoldaýdaǵy, ornyqty damýdy qamtamasyz etýdegi jáne jahandyq syn-qaterlerdi sheshýdegi Birikken Ulttar Uıymynyń ortalyq róline beıil ekenin rastady.

18. BUU, EQYU, sondaı-aq «QR — EO» jáne «OA — EO» formattaryndaǵy kópjaqty alańdar sheńberinde halyqaralyq kún tártibi men ekonomıkalyq damý máseleleri boıynsha ekijaqty saıası dıalogty jandandyrýǵa ýaǵdalasty.

19. 1972 jylǵy 10 sáýirdegi Bakterıologııalyq (bıologııalyq) jáne ýytty qarýdy ázirleýge, óndirýge jáne onyń qorlaryn jınaqtaýǵa tyıym salý, sondaı-aq olardy joıý týraly konventsııany odan ári nyǵaıtýǵa múddelilik tanytty.

Joǵary mártebeli Qazaqstan Respýblıkasynyń Prezıdenti Qasym-Jomart Toqaev pen Asa mártebeli Belgııalyqtar Koroli Fılıpp kelissózder qorytyndysyna kóńil tolatynyn jetkizip, Qazaqstan-Belgııa áriptestigine jańa serpin berý jolynda tabandylyq tanytatynyn rastady.

Taraptar Belgııalyqtar Koroliniń Qazaqstanǵa alǵashqy memlekettik sapary ekijaqty qatynastar tarıhyndaǵy mańyzdy kezeń bolatynyna jáne baılanystardy odan ári sapaly damytýǵa negiz qalaıtynyna senim bildirdi.

Buǵan deıin Memleket basshysy Qasym-Jomart Toqaev pen Belgııalyqtar Koroli Fılıpp Aqordada BAQ ókilderine arnalǵan brıfıng ótkizgenin jazǵanbyz.