Qasym-Jomart Toqaev pen Antonıý Koshta birlesken málimdeme jasady

ASTANA. KAZINFORM — Memleket basshysy Eýropalyq Keńes Prezıdentimen óte nátıjeli kelissóz júrgizilgenine, kezdesý emen-jarqyn, dostyq ráýishte ári konstrýktıvti sıpatta ótkenine toqtaldy, dep habarlaıdy Aqordanyń baspasóz qyzmeti.

— Qazaqstan men Eýropa Odaǵyn ózara senim men túsinistikke negizdelgen jan-jaqty yntymaqtastyq baılanystyrady. Biz kóptegen máseleni qarastyryp, seriktestigimizdi jańa ári sapaly deńgeıge shyǵarýǵa nıetti ekenimizdi rastadyq. Álginde aıtqanymdaı, Prezıdent Antonıý Koshtanyń elimizge sapary Keńeıtilgen seriktestik jáne yntymaqtastyq týraly kelisimniń 10 jyldyǵy qarsańynda ótip otyr. Qazaqstan — Ortalyq Azııa elderiniń ishinde «jańa býyn» kelisimine qol qoıyp, ratıfıkatsııalaǵan alǵashqy el. Bul mańyzdy qujat ekijaqty qarym-qatynastyń órbýine negiz qalap, saýda, ınvestıtsııa, ınfraqurylym, ınnovatsııa, mádenıet salalary sekildi ózara yqpaldastyqtyń barlyq basty baǵyttaryn qamtyǵan, — dedi Memleket basshysy.

Budan buryn Toqaev Eýropalyq Keńes Prezıdentin І dárejeli «Dostyq» ordenimen marapattaǵanyn jazdyq.

Sonymen qatar Memleket basshysy Eýropalyq Keńes Prezıdenti Antonıý Koshtamen kelissóz júrgizdi.

Shara barysynda Prezıdent Eýropa Odaǵy — Qazaqstannyń iri saýda jáne ınvestıtsııalyq seriktesi ekenin atap ótti.