Qasym-Jomart Toqaev pen Andreı Babısh shaǵyn quramda kelissóz júrgizdi

Qasym-Jomart Toqaev Andreı Babıshke iltıpat bildirip, Qazaqstan jurtshylyǵy ony Cheh Respýblıkasynda ǵana emes, Eýropaǵa belgili saıası qaıratker retinde jaqsy biletinin jetkizdi.

— Eki el arasynda burynnan tyǵyz ári dostyq qarym-qatynas ornaǵan. Saýda-sattyq tabysty damyp keledi. Qos halyqtyń bir birine qurmeti zor. Іri halyqaralyq qurylymdar sheńberinde birlese áreket etip kelemiz. Bul — óte mańyzdy. Elshilikterimiz belsendi jumys istep tur. Oraıly sátti paıdalana otyryp, Ózińizben birge cheh kásipkerlerinen quralǵan úlken delegatsııa alyp kelgenińiz úshin alǵys aıtamyn. Keshe Astanada bıznes-forým ótti. Onyń nátıjesi elderimizge paıdaly bolady dep oılaımyn. Óz tarapymnan san qyrly yntymaqtastyǵymyzdy odan ári damytýǵa bar kúshimdi salamyn, — dedi Prezıdent.

Andreı Babısh qonaqjaılyq tanytqany úshin Qasym-Jomart Toqaevqa rızashylyǵyn bildirip, elimizdiń túrli salada jetken jetistikterine joǵary baǵa berdi.

— Qazaqstan — Ortalyq Azııadaǵy asa mańyzdy memleket. Sondyqtan osynaý ǵajap elge saparmen kelý — men úshin zor mártebe. Jaqynda jańa Konstıtýtsııa qabyldadyńyzdar. Qutty bolsyn! Sizderdiń bul baǵyttaǵy tájirıbelerińiz bizge de paıdaly bolady dep esepteımin. Qazaqstanǵa kelý kópten bergi armanym edi. Óıtkeni men ýnıversıtetti aıaqtaǵannan keıin, ıaǵnı, 1978 jyly Shymkent jáne Jambyl (Taraz) qalalarymen ózara baılanys ornatqan departamentte jumys istedim. Qazaqstan — energetıka salasynda asa úlken orny bar el, álemdegi ýran óndiretin iri memleketterdiń qataryna kiredi. Búginde atom elektr stantsııalarynyń mańyzy arta tústi. Sol sebepti osy salada kelisimge kelgenimizge qýanyshtymyn. Qazaqstannyń jasandy ıntellekt baǵytyndaǵy jetistikteri tańqalarlyq. Eki elge ortaq dúnıe kóp. Chehııa men Qazaqstan úkimetteri ózara yntymaqtastyqty odan ári ilgeriletý úshin aıanbaı eńbek etedi dep oılaımyn, — dedi ol. 

Aıta ketelik Aqordada Cheh Respýblıkasynyń Premer-mınıstri Andreı Babıshti qarsy alý rásimi ótken edi.