Toqaev Chehııanyń syndarly ári pragmatıkalyq syrtqy saıasatyna joǵary baǵa berdi
ASTANA. KAZINFORM — Qasym-Jomart Toqaev pen Andreı Babısh keńeıtilgen quramda kelissóz júrgizdi, dep habarlaıdy Aqordanyń baspasóz qyzmeti.
Eki el delegatsııalarynyń qatysýymen ótken kelissóz barysynda Prezıdent ózara yqpaldastyqty odan ári nyǵaıtýdyń áleýeti mol ekenine toqtaldy.
— Ekijaqty saıası yntymaqtastyq pen ekonomıkalyq qarym-qatynastyń bolashaǵy zor dep sanaımyn. BUU, EQYU jáne basqa da halyqaralyq uıymdar aıasyndaǵy mıssııalarymyz tyǵyz jumys istep, dıalogty turaqty túrde saqtap keledi. Kóptegen baǵyt boıynsha baılanystarymyzdy damytýǵa múmkindik jetkilikti, — dedi Memleket basshysy.
Qasym-Jomart Toqaev Chehııanyń syndarly ári pragmatıkalyq syrtqy saıasatyna joǵary baǵa berdi. Prezıdenttiń aıtýynsha, eki el arasyndaǵy saıası dıalog san qyrly seriktestikke qolaıly jaǵdaı jasaıdy. Parlamentaralyq yqpaldastyq qarqyndy damyp keledi.
Memleket basshysy Chehııa Qazaqstannyń Eýropa Odaǵyndaǵy negizgi saýda seriktesteriniń biri ekenine nazar aýdardy.
— Taýar aınalymynyń dınamıkasy kóńil kónshiterlikteı. Árıne, biz aldaǵy ýaqytta da saýda-ekonomıkalyq baılanystardy keńeıtýge nıettimiz. Búginde elimizde 190-nan astam cheh kompanııasy jumys istep jatyr, sonyń ishinde Škoda, Omnipol, Tatra jáne ZVVZ sekildi mańdaıaldy kásiporyndar men basqa da óndiris salasyndaǵy senimdi áriptesterimiz bar. Birlesken jobalardy júzege asyrýǵa múmkindik mol, — dedi Qasym-Jomart Toqaev.
Budan buryn Qasym-Jomart Toqaev pen Andreı Babısh shaǵyn quramda kelissóz júrgizgenin jazǵanbyz.
