Qazaqstandyq arnaıy jasaqtyń serbııalyq sarbazdardy jattyqtyrǵanyn qalaımyz — Výchıch
ASTANA. KAZINFORM — Memleket basshysy shaqyrýyn qabyl alyp, Astanaǵa resmı saparmen kelgeni úshin Prezıdent Aleksandr Výchıchke jáne delegatsııa múshelerine shynaıy rızashylyǵyn bildirdi. Bul týraly Aqordanyń baspasóz qyzmeti habarlady.
Aleksandr Výchıch Qazaqstannyń ekonomıkasy damyp, kópvektorly syrtqy saıasat tabysty ilgerilep kele jatqanyn atap ótti.
Sondaı-aq ol Prezıdent Qasym-Jomart Toqaevtyń basshylyǵymen qazaq halqy jańa jetistikterge jete berýine tilektestik bildirdi.
– Qazaqstannyń keleshegi jarqyn. Serbııanyń sizderden úıreneri kóp. Sizdi jáne Qazaqstan halqyn úlgi tutatynymdy aıtýdan esh uıalmaımyn. Elderimiz arasyndaǵy shynaıy dostyq keleshektegi qarym-qatynasymyzǵa negiz bolady. Biz bul baılanystardy ekonomıka, aýyl sharýashylyǵy, aqparattyq tehnologııa, jasandy ıntellekt, robotty tehnıka jáne bilim berý sekildi salalarda damyta alamyz, – dedi Aleksandr Výchıch.
Serbııa Prezıdenti qazaq jáne serb komandalary qatysqan UAE SWAT Challenge-2026 halyqaralyq jarysyn asqan qyzyǵýshylyqpen tamashalaǵanyn aıtty. Osy oraıda ol Memleket basshysynan arnaıy bólimsheler qyzmetkerlerin daıarlaý isine qolǵabys etýdi surady.
– Bul baǵytta Qazaqstannyń álemde úzdik ekeni sózsiz. Men muny Serbııa azamattary bilgenin qalaımyn. Bizdiń qurama keıbir jarys túrleri boıynsha jaqsy óner kórsetti. Al qazaq jigitteri men qyzdary birde-bir saıysta súringen joq. Men bundaıdy buryn-sońdy kórgen emespin. Arnaıy jasaq qyzmetkerlerińiz eń joǵary deńgeıden kórindi. Olar bizdiń sarbazdardy jattyqtyrsa durys bolar edi. Sizderdi qaýipsizdik salasyndaǵy keremet jetistikterińizben taǵy da quttyqtaımyn, – dedi Aleksandr Výchıch.
Aıta ketelik Qasym-Jomart Toqaev Serbııa Prezıdenti Aleksandr Výchıchti Aqordada qarsy alǵan edi.