Qasym-Jomart Toqaev pen Aleksandr Stýbb Birlesken málimdeme qabyldady

ASTANA. KAZINFORM – Kelissóz qorytyndysy boıynsha eki el basshysy Birlesken málimdeme qabyldady. Bul týraly Aqordanyń baspasóz qyzmeti habarlady. 

Qujatta taraptardyń ortaq ustanymdary men búgingi kelissóz barysynda aıtylǵan bastamalary kórinis tapty. 

Atap aıtqanda, Qazaqstan Respýblıkasynyń Prezıdenti men Fınlıandııa Respýblıkasynyń Prezıdenti tómendegiler týraly málimdedi:

1. Taraptar Qazaqstan men Fınlıandııa arasyndaǵy dostyqqa, ózara qurmet pen tabysty yntymaqtastyqqa negizdelgen 33 jyldan astam ýaqyttaǵy dıplomatııalyq qatynastardy atap ótip, Qazaqstan-Fınlıandııa áriptestigin odan ári nyǵaıtýǵa jáne ártaraptandyrýǵa berik beıildiligin rastady.
2. Prezıdentter ekijaqty yntymaqtastyqtyń kún tártibindegi aýqymdy máseleler, jahandyq jáne óńirlik oqıǵalar boıynsha mazmundy pikir almasty. Olar turaqty baılanystardy qoldap otyrýdyń mańyzdylyǵyn atap ótti jáne ózara qyzyǵýshylyq týdyratyn máseleler boıynsha syndarly dıalogty jalǵastyrýǵa ýaǵdalasty.
3. Taraptar kópjaqty yntymaqtastyqqa, sondaı-aq barlyq memleketterdiń egemendigin, táýelsizdigin jáne aýmaqtyq tutastyǵyn qurmetteýdi qosa alǵanda, halyqaralyq quqyqtyń jáne Birikken Ulttar Uıymy Jarǵysynyń negiz quraýshy qaǵıdattaryna adaldyǵyn taǵy da rastady. Olar daýlar men shıelenisterdi beıbit, saıası jáne dıplomatııalyq joldarmen retteýdiń mańyzdylyǵyn atap ótti.
4. Prezıdentter shaǵyn jáne orta kásiporyndardy qoldaýǵa erekshe mán bere otyryp, ekonomıka, saýda jáne ınvestıtsııa salasyndaǵy yntymaqtastyqty keńeıtýge jáne bıznes júrgizýdiń ornyqty tásilderin ilgeriletýge ýaǵdalasty. Olar energetıka, energııa tıimdiligi, ekologııalyq tehnologııalar, sý resýrstaryn jáne orman sharýashylyǵyn basqarý, qurylys, aqparattyq-kommýnıkatsııalyq tehnologııalar, ınfraqurylym, kólik jáne logıstıka, ınjenerııa jáne ozyq ónerkásip ınnovatsııalary sııaqty negizgi salalardaǵy yntymaqtastyqty nyǵaıtý nıetin bildirdi. Taraptar tsıfrlyq damý jáne jasandy ıntellekt salasyndaǵy yntymaqtastyqtyń áleýetin atap ótti. Prezıdentter Azııa men Eýropa arasyndaǵy senimdi ári tıimdi baǵyt retinde mańyzy artyp kele jatqan Transkaspıı halyqaralyq kólik baǵytyn (THKB) moıyndap, ony damytýdaǵy Qazaqstannyń negizgi rólin atap ótti. Taraptar Eýropa Odaǵynyń «Global Gateway» jobasynyń iske asyrylýyna qoldaý bildirdi. Osyǵan baılanysty olar Saýda-ekonomıkalyq yntymaqtastyq jónindegi Qazaqstan-Fınlıandııa úkimetaralyq komıssııasynyń ekijaqty baılanystardy nyǵaıtýdyń tıimdi alańy retindegi rólin atap ótip, resmı sapar aıasynda bıznes-forýmnyń ótkizilýin qoldady.
5. Prezıdentter «Astana» halyqaralyq qarjy ortalyǵynyń (AHQO) halyqaralyq ınvestıtsııalyq yntymaqtastyqty jáne qarjylyq ınnovatsııalardy qoldaýdaǵy rólin moıyndaı otyryp, ornyqty qarjylandyrýdy ilgeriletý jáne qarjy tehnologııalaryn damytý maqsatynda AHQO men fın qarjylyq jáne ınnovatsııalyq ınstıtýttary arasyndaǵy yntymaqtastyqtyń áleýetin zerdeleýge shaqyrdy.
6. Prezıdentter bitimgershilik salasyndaǵy yntymaqtastyqty nyǵaıtýǵa, onyń ishinde Qazaqstan Respýblıkasy Qorǵanys mınıstrliginiń Bitimgershilik operatsııalar ortalyǵy (KAZCENT) men Fınlıandııa Qorǵanys kúshteriniń Halyqaralyq ortalyǵy (FINCENT) arasyndaǵy ózara is-qımyldy jalǵastyrý arqyly nyǵaıtýǵa degen múddelerin rastady.
7. Prezıdentter ornyqty týrızm salasyndaǵy ozyq tájirıbelerdi qoldanýdy qosa alǵanda, bilim men tájirıbe almasýǵa basa nazar aýdara otyryp týrızm salasynda barynsha tyǵyz yntymaqtastyqqa qoldaý bildiretinderin taǵy rastady.
8. Prezıdentter joǵary bilim, ǵylym jáne zertteýler júrgizý salasyndaǵy ekijaqty yntymaqtastyqty qoldaýǵa, sondaı-aq birlesken akademııalyq jáne ǵylymı bastamalardy iske asyrý múmkindikterin zerdeleýge ýaǵdalasty.
9. Taraptar eki el arasyndaǵy mádenı baılanystardy tereńdetýdi qoldaı otyryp, mádenı yntymaqtastyqty kórmeler, kontsertter, festıvalder jáne kıno kórsetilimderin ótkizý arqyly jandandyrý nıetterin bildirdi.
10. Taraptar kóshi-qon saıasaty salasyndaǵy yntymaqtastyqty nyǵaıtýdyń jáne vızalyq rejımdi yryqtandyrý dıalogyn ilgeriletýdiń mańyzdylyǵyn atap ótti. Olar Qazaqstan Respýblıkasy men Eýropa Odaǵy arasyndaǵy vızalyq rejımdi jeńildetý týraly kelissózderdiń bastalǵanyn qoldap, tıisti kelisimniń ýaqtyly jasalýyna múddeli ekenderin rastady.
11. Taraptar 2020 jylǵy 1 naýryzda kúshine engen Bir jaǵynan Qazaqstan Respýblıkasy, ekinshi jaǵynan Eýropa Odaǵy men oǵan múshe memleketter arasyndaǵy keńeıtilgen áriptestik pen yntymaqtastyq týraly kelisim sheńberinde tyǵyz yntymaqtastyqty jalǵastyrýǵa daıyn ekenderin atap ótti.
12. Prezıdentter órkendeý men ornyqty damýdy qoldaýdyń mańyzdy tetigi retinde Ortalyq Azııa men Eýropa Odaǵy arasyndaǵy dıalogty nyǵaıtýǵa beıildilikterin rastady.
13. Fınlıandııa Respýblıkasynyń Prezıdenti Ortalyq Azııa óńirindegi yntymaqtastyqty odan ári tereńdetýdegi, beıbitshilikti nyǵaıtýdaǵy, dostyq, senim jáne tatý kórshilik ahýalyn qalyptastyrýdaǵy, sondaı-aq onyń halyqaralyq arenadaǵy mańyzdylyǵyn arttyrýdaǵy Ortalyq Azııa memleketteri basshylarynyń konsýltatıvtik kezdesýleriniń rólin aıryqsha atap ótti.
14. Prezıdentter 2030 jylǵa deıingi Ornyqty damý kún tártibin jáne Ornyqty damý maqsattaryn (ODM) iske asyrýǵa járdemdesýge jáne olardy jyldamdatýǵa, sondaı-aq sý resýrstaryn basqarýǵa, lastanýmen jáne shóleıttenýmen kúresýge, bıologııalyq áralýandylyqty saqtaýǵa jáne apat táýekelderin tómendetýge erekshe nazar aýdara otyryp, klımattyń ózgerýi máselesin sheshýdiń birlesken tásilderin ilgeriletýge ýaǵdalasty.
15. Taraptar 2026 jylǵy sáýirde Qazaqstanda Birikken Ulttar Uıymymen jáne basqa da jetekshi halyqaralyq uıymdarmen áriptestikte ótetin jáne klımattyń ózgerýi, «jasyl» ekonomıkaǵa kóshý jáne Ortalyq Azııa men onyń sheginen tys jerlerde ornyqty damý máseleleri boıynsha dıalogty ilgeriletýge arnalǵan mańyzdy halyqaralyq alań qyzmetin atqaratyn Óńirlik ekologııalyq sammıtti qoldady.
16. Fınlıandııa Qazaqstannyń Almatyda Birikken Ulttar Uıymynyń Ortalyq Azııa men Aýǵanstanǵa arnalǵan ornyqty damý maqsattary jónindegi óńirlik ortalyǵyn qurý jónindegi bastamasyn qoldady. Óz kezeginde, Qazaqstan Fınlıandııaǵa Birikken Ulttar Uıymynyń tıisti qararyna qoldaý jasaǵany jáne teń avtorlyǵy úshin shynaıy rızashylyǵyn bildirip, eki eldiń turaqty damýdy qoldaýǵa, óńirlik turaqtylyqty nyǵaıtýǵa jáne jahandyq syn-qaterlerdi kópjaqty yntymaqtastyq arqyly sheshýge ortaq túrde beıildi ekendigin atap ótti.
17. Taraptar Birikken Ulttar Uıymy Jarǵysynyń qaǵıdattaryna sáıkes Ýkraınada jappaı, ádil jáne turaqty beıbitshilikti tezirek ornatýdyń mańyzdylyǵyn atap ótti.
18. Qazaqstan Respýblıkasynyń Prezıdenti Fınlıandııanyń 2025 jyly EQYU-ǵa belsendi tóraǵalyq etkenin atap ótti jáne osy jaýapty mandatty tabysty aıaqtaýǵa tilektestigin bildirdi.
19. Prezıdentter resmı sapar barysynda qol jetkizilgen ýaǵdalastyqtar halyqtarymyzdyń múddesi úshin ekijaqty yntymaqtastyqty jan-jaqty damytýǵa jańa serpin beretinine senim bildirdi.
20. Prezıdentter eki el arasyndaǵy qarym-qatynastardy odan ári nyǵaıtý jáne yntymaqtastyqty tereńdetý maqsatynda tyǵyz dıalogty qoldap otyrýǵa ýaǵdalasty.

Eske sala keteıik, buǵan deıin Aqordada Memleket basshysy Qasym-Jomart Toqaev elimizge resmı saparmen kelgen Fınlıandııa Prezıdenti Aleksandr Stýbbty qarsy alǵanyn habarlaǵan edik. 

Sodan soń Memleket basshysy elimizge resmı saparmen kelgen Fınlıandııa prezıdenti Aleksandr Stýbbpen kelissózder júrgizdi.

Munan keıin Qazaqstan men Fınlıandııa prezıdentteriniń kelissózi eki el delegatsııalarynyń qatysýymen odan ary jalǵasqanyn jazǵanbyz.