Qazaqstan men Estonııa bıznes forýmda 517 mln dollarlyq kelisimderge qol qoıdy
ASTANA. KAZINFORM — Qasym-Jomart Toqaev pen Alar Karıs Qazaqstan-Estonııa bıznes forýmynda sóz sóıledi, dep habarlaıdy Aqordanyń baspasóz qyzmeti.
Memleket basshysy Qazaqstan men Estonııanyń iskerlik top ókilderi qatysyp jatqan bıznes-forým saýda jáne ınvestıtsııa salasyndaǵy ekijaqty yqpaldastyqty jandandyrýǵa septigin tıgizetinine senim bildirdi.
Qasym-Jomart Toqaev kólik-logıstıka, tsıfrlandyrý, aýyl sharýashylyǵy, ónerkásip, qarjy jáne bilim berý salalaryndaǵy ózara tıimdi seriktestiktiń perspektıvti baǵyttaryna toqtaldy.
Sondaı-aq elimizde estonııalyq bıznestiń keńeıýine jan-jaqty qoldaý bildirýge daıyn ekenin rastady.
Jıynda Estonııa Prezıdenti Alar Karıs te sóz sóıledi.
Bıznes-forým aıasynda eki el kompanııalary jalpy quny 517 mıllıon dollardan asatyn 11 kommertsııalyq qujatqa qol qoıdy.
Budan buryn Aqordada Memleket basshysy Qasym-Jomart Toqaev elimizge memlekettik saparmen kelgen Estonııa Prezıdenti Alar Karısty qarsy alǵanyn jazǵan edik.
Keıinnen Qazaqstan men Estonııa prezıdentteri kelissóz júrgizdi.
Prezıdent Qazaqstan Estonııany Baltyq óńirindegi, sondaı-aq jalpy Eýropalyq odaqtaǵy óte mańyzdy áriptes retinde qarastyratynyn atap ótti.
Óz kezeginde Estonııa Prezıdenti Qazaqstan bilim berý salasynda aıtarlyqtaı alǵa jyljyǵanyn aıtty.
Sonymen qatar Qazaqstan stýdentteri Estonııa ýnıversıtetterinen taǵylymdamadan ótetini belgili boldy.
