Qasym-Jomart Toqaev Ózbekstan prezıdentimen beıresmı kezdesý ótkizdi
BUHARA. KAZINFORM – Memleket basshysy Qasym-Jomart Toqaev Ózbekstan prezıdenti Shavkat Mırzıeevpen beıresmı kezdesý ótkizdi. Bul týraly Aqordanyń baspasóz qyzmeti habarlady.
Qasym-Jomart Toqaev Prezıdent Shavkat Mırzıeevke qonaqjaılyqpen qarsy alyp, búgingi beıresmı kezdesýdi uıymdastyrǵany úshin rızashylyǵyn bildirdi.
– Shyn máninde, qazirgi geosaıası qubylmaly jaǵdaıdy eskersek, bul saparymdy óte mańyzdy dep aıtsaq, qate bolmas. Ózbek eli – Qazaqstan úshin senimdi strategııalyq seriktes. Biz osy sapar barysynda ózekti máseleler jóninde pikir almasamyz. Kún tártibinde ekijaqty qarym-qatynasymyz boıynsha birqatar asa mańyzdy másele bar. Alaıda bizdiń aramyzda eshqandaı túsinbeýshilik, ıá bolmasa kedergi joq. Qol qoıylǵan jobalar, josparlar birte-birte oryndalýda. Bizdiń Úkimet barlyq kelisimderdi buljytpaı iske asyrý mindetin jaqsy túsinip otyr. Meniń baqylaýymmen tıisti jumysty atqaryp jatyr, dedi Memleket basshysy.
Prezıdent 2,5 myń jyldan asa tarıhy bar kıeli Buhara shahary álemdik tarıhı-mádenı muranyń ajyramas bóligi sanalatynyn atap ótti.
– Buhara – Shyǵystyń orta ǵasyrlardaǵy rýhanı ári zııatkerlik ortalyqtarynyń biri. Bul kóne shahar men qazaq halqynyń arasynda belgili-belgisiz baılanystar kóp. Qazaqtyń áıgili oıshyly Máshhúr Júsip Buharada ilim jıǵan. Ǵasyrlar boıy qazaqtyń kóptegen zııalylary Buharada bilim alyp, jergilikti medreselerde oqyǵan. Munda adamzattyń órkendeýine aıryqsha áser etken kezeńder men uly órkenıettiń tynysyn sezinesiz. Búginde Buhara óziniń myńjyldyq dástúri men Jańa Ózbekstannyń qarqyndy damýyn úılestirip otyr. Qazirgi Buharany tamashalap, barlyq ǵımaratqa jappaı aýqymdy jańǵyrtý jumystary júrgizilgenine kýá boldyq. Bul – óte úlken istiń nátıjesi, eń bastysy, uly tarıhı muraǵa memleket tarapynan jasalǵan qamqorlyqtyń kórinisi, dedi Memleket basshysy.
Buǵan deıin Memleket basshysynyń Ózbekstanǵa jumys saparymen barǵanyn jazǵan edik. Sodan keıin Qasym-Jomart Toqaev pen Shavkat Mırzıeev Bahaýddın Naqyshbandı memorıaldyq keshenin aralady.
