Qasym-Jomart Toqaev úsh strategııalyq mańyzdy avtomobıl jolynyń qurylysyn bastap berdi
ASTANA. KAZINFORM – Memleket basshysy Qasym-Jomart Toqaev telekópir arqyly «Qyzylorda – Sekseýil», «Ulǵaısyn – Sekseýil» jáne «Beıneý – Sekseýil» avtokólik joldarynyń qurylysyn bastap berdi. Bul týraly Aqorda habarlady.
Qasym-Jomart Toqaev Ótken jyly 13 myń shaqyrym avtokólik jolyn salý jáne jóndeý jumysy júrgizilgenin atap ótti.
Prezıdenttiń aıtýynsha, bul jumystyń bári Qazaqstannyń kólik-logıstıka salasyndaǵy áleýeti zor ekenin kórsetedi.
– Ótken jyly elimizdegi jalpy tasymal kólemi 6 paıyzǵa artyp, shamamen 37 mıllıon tonna boldy. Bıyl «Moıynty – Qyzyljar» jáne «Darbaza – Maqtaaral», al kelesi jyly «Baqty – Aıagóz» temirjol jelisiniń qurylysy aıaqtalady. Budan bólek, biz avtokólik salasyna erekshe nazar aýdaryp otyrmyz. Sońǵy jyldary Qazaqstanda tas joldardy túbegeıli jańǵyrtý jumysy qolǵa alyndy. Birqatar iri ınfraqurylymdyq joba tabysty aıaqtaldy. «Batys Eýropa – Batys Qytaı», «Qaraǵandy – Almaty», «Ortalyq – Ońtústik», «Atyraý – Astrahan», «Taldyqorǵan – Óskemen», «Qalbataý – Maıqapshaǵaı» baǵytyndaǵy joldar – sonyń aıqyn dáleli. Keıingi 5 jylda avtokólikpen júk tasymaldaý kólemi eki ese artty. Byltyr osy qyzmet túrinen túsetin tabys 1,5 trıllıon teńgege jetti. Ózderińiz bilesizder, elimiz arqyly 8 halyqaralyq dáliz ótedi. Bul jolmen kún saıyn 35 myńǵa jýyq avtokólik júredi. Ótken jyly 13 myń shaqyrym avtokólik jolyn salý jáne jóndeý jumysy júrgizildi. Sonyń 6 myń shaqyrymy halyq ıgiligine berildi. Kelesi jyly avtokólikterdi ótkizý beketteri tolyq jańartylady. Mundaı aýqymdy jumys Táýelsizdik tarıhynda alǵash ret júzege asyrylyp otyr, – dedi Qasym-Jomart Toqaev.
Memleket basshysy qazir Qazaqstannyń ár aımaǵynda avtojoldar jóndelip jatqanyn atap ótti.
– Jaqynda Saryaǵash aınalma jolynyń qurylysy men «Jezqazǵan – Qaraǵandy» avtojolyn jóndeý jumysy bastaldy. Sonymen qatar elimiz boıynsha kóptegen turǵyn úı, mektep, aýrýhana, ınjenerlik jeli salynyp jatyr, basqa da áleýmettik nysandar boı kóterýde. Bir sózben, Qazaqstan úlken qurylys alańyna aınalatyn boldy. Bul memleketimizdiń ósip-órkendeý jolyna túsip, jańa damý kezeńine qadam basqanyn kórsetedi, – dedi Prezıdent.
