Qasym-Jomart Toqaev OSK 30 jyldyǵyna arnalǵan konferentsııa qatysýshylaryna quttyqtaý joldady

Memleket basshysy Qasym-Jomart Toqaev «Konstıtýtsııalyq reforma jáne saılaý júıesi» halyqaralyq ǵylymı tájirıbelik konferentsııasy qatysýshylaryna quttyqtaý joldady. Quttyqtaýdy Prezıdent keńesshisi Ernar Baspaev oqyp berdi, dep habarlaıdy Kazinform. 

«Táýelsizdik jyldarynda elimizdiń saılaý organdary dáıekti damý jolynan ótip, memlekettik bıliktiń asa mańyzdy ınstıtýttaryn qalyptastyrý isine eleýli úles qosty. Bul organdar saılaý quqyǵyna qatysty álemdik deńgeıdegi joǵary talaptardy árdaıym saqtaı bildi. Sondaı-aq halyqaralyq seriktestermen yntymaqtastyqty nyǵaıtyp, qoǵammen ashyq dıalog ornatty. Mysaly, sheteldiń ozyq tájirıbesin eskere otyryp, aýmaqtyq komıssııalardyń kásibı deńgeıin kóterý, jumysyn jaqsartý jáne onyń árbir múshesiniń mártebesin aıqyndaý úshin naqty sharalar qabyldady. Byltyrǵy jalpyulttyq referendýmda halyqtyń basym bóliginiń qoldaýyna ıe bolǵan aýqymdy konstıtýtsııalyq reforma saılaý júıesin jańǵyrta túsýge jol ashty. Qazaqstanda jan-jaqty ózgerister kezeńinde saılaý zańnamasy únemi jetildirilip otyrýǵa basa mán berildi. Osy kúrdeli ári jaýapty mindetti oryndaý úshin sarapshylar qaýymymen tyǵyz qarym-qatynas ornatýdyń mańyzy zor. Búgingi bas qosýda bul salany damytýǵa qatysty salmaqty oı-pikirler aıtylyp, tyń tásilder usynylady dep senemin. Barshańyzǵa baq-bereke, tolǵaı tabys tileımin. Konferentsııa jumysy jemisti bolsyn», - delingen Prezıdent quttyqtaýynda.
Aıta keteıik, konferentsııa jumysyna 10 eldiń Ortalyq saılaý komıssııalarynyń, 6 halyqaralyq uıymnyń basshylary qatysýda.