Qasym-Jomart Toqaev Ortalyq Azııa — Qytaı gýmanıtarlyq forýmyna quttyqtaý joldady
ASTANA. KAZINFORM — QR Memlekettik keńesshisi Erlan Qarın Qytaı men Ortalyq Azııanyń «Tatý kórshilik jáne dostyq: bolashaqqa birge qadam» atty gýmanıtarlyq almasý forýmynda Memleket basshysy Qasym-Jomart Toqaevtyń quttyqtaý hatyn oqyp berdi.
— Qadirli qaýym! Sizderdi Ortalyq Azııa — Qytaı gýmanıtarlyq forýmynyń ashylýymen quttyqtaımyn! Qytaı Halyq Respýblıkasynyń Tóraǵasy Sı Tszınpın myrzanyń Astana sapary aıasynda osyndaı alqaly jıyn ótkizý ıgi dástúrge aınaldy. «Tatý kórshilik jáne dostyq: bolashaqqa birge qadam» degen taqyryppen ótip jatqan basqosý — elderimizdiń qarym-qatynasyn nyǵaıta túsetin taǵy bir mańyzdy is-shara. Qazaqstan men Qytaı arasyndaǵy yntymaqtastyq tatý kórshilik pen máńgi dostyq rýhynda damyp keledi. Tereńnen tamyr tartatyn shynaıy seriktestigimiz búginde strategııalyq sıpat alyp, múldem jańa deńgeıge kóterildi. Mádenıet — halyqtar men órkenıetterdi jalǵaıtyn altyn kópir. Eki eldiń birligin bekemdeý jolynda mádenı-gýmanıtarlyq baılanystar aıryqsha ról atqarady. Sondyqtan biz osy baǵyttaǵy ózara yntymaqtastyǵymyzdy kúsheıtýge erekshe mán beremiz. Búgingi jıynda qos halyqtyń myzǵymas qundylyqtary, ómir salty men aqparattyq qaýipsizdigi jaıynda tolymdy oı-pikirler aıtylady dep senemin. Barshańyzǵa tolaǵaı tabys, baq-bereke tileımin. Forým jumysy jemisti bolsyn! — delingen Prezıdent Qasym-Jomart Toqaevtyń quttyqtaý hatynda.
Buǵan deıin Prezıdent Qasym-Jomart Toqaev Qytaı Halyq Respýblıkasynyń Tóraǵasy Sı Tszınpındi Astana áýejaıynan qarsy alǵanyn jazǵan edik.