Prezıdent «Ortalyq Azııa — Qytaı» formatynyń áleýetin paıdalanýdy usyndy
ASTANA. KAZINFORM — Memleket basshysy óńir elderiniń ekonomıkalyq yntymaqtastyǵyn nyǵaıtý men damytý, birlesken ınfraqurylymdyq jobalardy júzege asyrý qaýipsizdik máselesimen tyǵyz baılanysty ekenin aıtty, dep habarlaıdy Aqordanyń baspasóz qyzmeti.
— Transkaspıı halyqaralyq kólik baǵyty eýrazııalyq logıstıkanyń strategııalyq elementine aınalyp keledi. Jahandyq saýda tizbeginiń transformatsııasyna jáne geosaıası qysymnyń kúsheıýine sáıkes onyń mańyzy eselep artty. Sonymen qatar júk tasymalyn ulǵaıtýdyń belgili bir qaýip-qaterleri bar. Áńgime transulttyq qylmys, sonyń ishinde kontrabanda, esirtki, qarý-jaraq tasymaly týraly bolyp otyr, — dedi Qasym-Jomart Toqaev.
Prezıdent óńirlik qaýipsizdiktiń tıimdi júıesin qurý úshin «Ortalyq Azııa — Qytaı» formatynyń áleýetin paıdalaný qajettigin jetkizdi.
— Meniń oıymsha, ishki ister mınıstrlikteri bir-birimen yntymaqtastyqty kúsheıtip, qaýipsizdik jáne qoǵamdyq tártip máselelerine qatysty aqparattarmen bólisýi tıis. Bul halyqtarymyzdyń arman-tilegine tolyǵymen saı keledi. Jurtshylyq memleketter basshylarynan óz elderin tártipke keltirip, qalypty ári qaýipsiz ómirge qolaıly jaǵdaı jasaý úshin asa shuǵyl, tıimdi sheshimder qabyldaýdy talap etip otyr. Balalarymyz, jalpy halyq el basshylarynyń, ishki ister mınıstrleri men basqa da vedomstvo jetekshileriniń zańǵa sáıkes qoǵamdyq tártipti saqtaý sharalaryn qabyldap jatqandaryna kózderi jetip, ózderin qaýipsiz sezinýi qajet, — dedi Memleket basshysy.
Sonymen qatar, Qasym-Jomart Toqaev Qazaqstannyń Qytaı Halyq Respýblıkasymen jáne Ortalyq Azııa memleketterimen ózara senim, tatý kórshilik, ortaq jaýapkershilik negizindegi yntymaqtastyqty ilgeriletýge erekshe mán beretinin jetkizdi.
Kezdesýge qatysýshylar ózara baılanystardy jolǵa qoıýǵa, jedel aqparat almasýǵa, kásibı qarym-qatynastardy damytýǵa jáne quqyq qorǵaý organdarynyń qyzmetine zamanaýı tehnologııalardy engizýge nıetti ekenderin rastady.
Prezıdent atalǵan jıynnyń Ortalyq Azııa men Qytaı aýmaǵyndaǵy qaýipsizdikti qamtamasyz etý boıynsha seriktestik pen yqpaldastyqqa tyń serpin beretinine senim bildirdi.
Aıta keteıik, budan buryn Prezıdent «Ortalyq Azııa — Qytaı» formatyndaǵy elderdiń ishki ister jáne qoǵamdyq qaýipsizdik mınıstrlerin qabyldaǵanyn jazǵan edik.
