Qasym-Jomart Toqaev Orta dálizdi damytý tetikterin atady
ASTANA. KAZINFORM — Qazaqstan men Qytaıdyń ekijaqty saýdasy jańa rekordtyq kórsetkishke jetti. Bul týraly Sınhýa agenttigine bergen jazbasha suhbatynda Qazaqstan Prezıdenti Qasym-Jomart Toqaev málim etti.
Memleket basshysy Qytaı Qazaqstannyń syrtqy saýda seriktesteri arasynda birinshi orynda turǵanyn aıtty. Taǵy bir strategııalyq baǵyt — kólik jáne logıstıka. Qazaqstan — Shyǵys pen Batysty toǵystyryp jatqan óńir.
— Qytaılyq seriktesterimizben birge osy geografııalyq artyqshylyqty Eýrazııa aýqymyndaǵy zamanaýı kólik-logıstıka ınfraqurylymyna aınaldyryp kelemiz. «Bir beldeý, bir jol» megajobasyn damytý, Transkaspıı halyqaralyq kólik baǵdaryn ilgeriletý, jańa temirjol jelilerin salý, qurǵaq porttar men logıstıkalyq termınaldardy keńeıtý, shekaralyq ınfraqurylymdy jańǵyrtý Azııa men Eýropa arasyndaǵy kólik baılanystarynyń múlde jańa júıesin qalyptastyryp keledi, — dedi Qasym-Jomart Toqaev.
Qazaqstan Prezıdentiniń aıtýynsha, Transkaspıı halyqaralyq kólik baǵytyn, ıaǵnı, búginde Qytaı men Eýropa arasyndaǵy kólik qatynasynyń asa mańyzdy býynyna aınalyp kele jatqan Orta dálizdi damytý — yntymaqtastyq aıasyndaǵy basymdyqtardyń biri.
— Ortaq mindetimiz — osy baǵyttyń básekege qabilettiligin barynsha arttyrý. Sondyqtan «aqyldy keden» júıesin engizýge, qujat aınalymyn tsıfrlandyrýǵa, aqparattyq júıelerdi ózara úılestirý men shekaralyq rásimderdi avtomattandyrýǵa aıryqsha mán beremiz. Qazaqstan men Qytaı arasynda yqpaldastyqtyń jańa belesi bastaldy. Búginde yntymaqtastyq naqty sektordaǵy dástúrli baǵyttardan bastap, tsıfrlyq ekonomıka salasyndaǵy seriktestikke deıingi keń aýqymdy qamtıdy, — dedi Memleket basshysy.
Aıta keteıik, 1 qyrkúıek kúni ShYU-ǵa múshe memleketter basshylary keńesiniń otyrysynda birqatar qujatqa qol qoıyldy.
