Qasym-Jomart Toqaev Oman Sultandyǵynyń Ál Saıd ordenimen marapattaldy
ASTANA. KAZINFORM – Oman Sultan Haısam ben Tarıq Ál Saıd Prezıdent Qasym-Jomart Toqaevty Oman Sultandyǵynyń eń joǵary memlekettik nagradasy – Ál Saıd ordenimen marapattady.
Joǵary memlekettik nagradany tabystaý rásimi Táýelsizdik saraıynda eki el Memleket basshylarynyń kelissózderinen keıin ótti.
Buǵan deıin Oman Sultany Qazaqstanǵa alǵashqy saparynda «Altyn Qyran» ordenimen marapattalǵanyn jazǵan edik.
Saltanatty is-shara barysynda Prezıdent Qasym-Jomart Toqaev Omannyń aımaqtaǵy turaqtylyqty nyǵaıtý, dinaralyq dıalogty órbitý jáne gýmanıtarlyq bastamalardy iske asyrý isindegi róline toqtaldy.
— Túrli taraptar arasyna dáneker bolyp, ózara túsinisýine talaı márte yqpal ettińiz. Osy alǵyrlyǵyńyz Omandy óńirlik jáne halyqaralyq qatynastarda salmaǵy bar elge aınaldyrdy. Biz bul ustanymdy joǵary baǵalaımyz. Elińiz shyn máninde ádil ári eshkimge bura tartpaıtyn beıtarap mámileger sanalady. Sizdiń tarıhı saparyńyz Qazaqstan men Oman arasyndaǵy ekijaqty qatynastar jylnamasynda mańyzdy kezeń retinde jazylady. Asa mártebeli Sultan, halyqtarymyz arasyndaǵy dostyqty nyǵaıtýǵa qosqan ólsheýsiz úlesińizdi eskerip, Sizge «Altyn Qyran» ordenin tabystaý — men úshin zor mártebe, — dedi Memleket basshysy.
