Qasym-Jomart Toqaev Olaf Sholtsti Aqordada qarsy aldy
ASTANA. KAZINFORM – Memleket basshysy Qasym-Jomart Toqaev Astanaǵa resmı saparmen kelgen Germanııanyń Federaldyq kantsleri Olaf Sholtsti Aqordada qarsy aldy.
Aldymen Qasym-Jomart Toqaev pen Olaf Sholts bir-birine resmı delegatsııa múshelerin tanystyrdy. Osydan keıin mártebeli meımannyń saparyna oraı Saltanatty rásimder zalynda sap túzegen qurmet qaraýylynyń bastyǵy Memleket basshylaryna sálemdik baıanat berdi. Prezıdent orkestri eki eldiń memlekettik ánuranyn oryndady.
Ánurandardy tyńdap bolǵannan keıin Qasym-Jomart Toqaev pen Olaf Sholts kilemshe boıymen Qazaqstan Respýblıkasynyń Memlekettik Týyna qaraı júrdi. Onyń aldyna kelgende meıman toqtap, basyn sál ıip, óziniń qurmetin bildirdi. Sonan soń meıman men Prezıdent qurmetti qaraýyl sapynyń boıymen júrdi. Qurmetti qaraýyl bastyǵymen qoshtasty.
Qazirgi ýaqytta Memleket basshylary joǵary deńgeıdegi kelissózder júrgizip jatyr. Munan bólek, «Ortalyq Azııa + Germanııa» formatyndaǵy ekinshi kezdesý de josparlanǵan.
