Qasym-Jomart Toqaev Nursultan Nazarbaevtyń memýary týraly pikir bildirdi

Memleket basshysy Qasym-Jomart Toqaev Egemen Qazaqstan gazetine bergen suhbatynda Tuńǵysh Prezıdent Nursultan Nazarbaevtyń memýary týraly suraqtarǵa jaýap berdi, dep habarlaıdy Kazinform.

«Tuńǵysh Prezıdenttiń memýary qoǵamda qyzý talqylandy. Siz de ol kitapty oqyǵan shyǵarsyz. Kóptegen sheshim men oqıǵaǵa tikeleı kýá bolǵan adam retinde qandaı áser aldyńyz? Ózińizdiń memýar jazatyn oıyńyz bar ma?», - dep suraq qoıdy «Qazaq gazetteri» JShS Bas dırektory Dıhan Qamzabekuly.

Óz jaýabynda Prezıdent bul kitaptyń táýelsiz memleket qurý isiniń jylnamasy retinde oqyrman qyzyǵýshylyǵyn týǵyzatynyn jetkizdi.

«Kezinde bir aıtqysh «Memýarda shyndyqtyń jartysy aıtylsa da, ol tarıhı oqıǵalardyń aýqymyn baǵamdaýǵa jetkilikti» degen eken. Nursultan Nazarbaev – birneshe dáýirge kýá bolǵan tarıhı tulǵa. Ol óz mansabyn komsomol belsendisi retinde Hrýşev zamanynda bastap, arada 60 jyldan astam ýaqyt ótkennen keıin qyzmetten ketti. Qazaqstannyń táýelsiz memleket bolyp qalyptasýyna qosqan úlesin bári biledi. Ol – ádil tarıhı baǵasyn alýǵa laıyq adam.

Men memýarlardy, pýblıtsıstıkalyq shyǵarmalardy, saıası ocherkterdi árdaıym yjdaǵatpen oqımyn. Al suraqqa kelsek, men úshin qazirgi kezeń memýar jazyp otyratyn ýaqyt emes», - dedi Qasym-Jomart Toqaev.

Eske sala ketsek, ótken aıda Tuńǵysh Prezıdent Nursultan Nazarbaev «Meniń ómirim. Bodandyqtan bostandyqqa» atty ómirbaıandyq kitabyn shyǵarǵan edi.