Qasym-Jomart Toqaev Nazarbaev pen Pýtın kezdesýine pikir bildirdi

ASTANA. KAZINFORM –  «Turkistan» gazetine suhbat bergen Memleket basshysy Qasym-Jomart Toqaev Kremlde Nursultan Nazarbaev pen Vladımır Pýtınniń kezdesýine qatysty pikir bildirdi.

– Turaqty túrde ótkizilip júrgen kezdesýler beıresmı sıpatqa ıe. Muny Reseı prezıdentiniń ózi de atap ótedi. Taıaýda ótken Sankt-Peterbýrgtegi basqosýda Vladımır Pýtın maǵan Nursultan Nazarbaevty onyń ótinip suraýy boıynsha qabyldaıtynyn aıtqan edi. Reseı prezıdentiniń ereksheligi: ol dostarymen jáne áriptesterimen jyly qarym-qatynas qura biledi. Jumysy óte qarbalas bolsa da, senbi kúni Qazaqstannyń Tuńǵysh prezıdentimen asyqpaı áńgimelesýge ýaqytyn bóldi. Ol Nursultan Nazarbaevty Eýrazııadaǵy yqpaldastyq úderisiniń bastaýynda turǵan tájirıbeli saıasatker retinde baǵalaıdy. Reseı bul úderiste jetekshi ról atqaryp otyr, - dedi Prezıdent.

Memleket basshysynyń paıymynsha, Kremldegi kezdesý Vladımır Pýtınniń adamgershiligi joǵary ekenin kórsetedi.

- Ondaı áńgimeler barysynda ne aıtylǵany maǵan qyzyq emes, bul týraly eshqashan suraq qoımaımyn. Al Nursultan Nazarbaevtyń jeke basyna keler bolsaq, men ony qazirgi qazaq memlekettiginiń negizin qalaǵan tulǵa dep sanaıtynymdy birneshe ret aıttym. Onyń memlekettik ınstıtýttardy jáne ekonomıkanyń naryqtyq tetikterin qurý, jańa astanamyzdy salý jolyndaǵy eńbegin bári biledi. Ózińizge málim, biz Qazaqstandy Ádildik, Zań jáne Tártip ornaǵan el etkimiz keledi. Sondyqtan eshkimdi alalamaı, ár azamattyń eńbegin ádil baǵalaý kerek. Bul elimizdiń Tuńǵysh prezıdenti Nursultan Nazarbaevqa da qatysty, - dedi Qasym-Jomart Toqaev.

Aıta keteıik, búgin Turkistan» gazetinde Memleket basshysy Qasym-Jomart Toqaevtyń atalǵan basylymnyń bas redaktory, belgili aqyn, pýblıtsıst Baýyrjan Babajanulyna bergen keń kólemdi suhbaty jarııalandy.