Qasym-Jomart Toqaev Muhtar Shahanovtyń qaıtys bolýyna baılanysty kóńil aıtty
ASTANA. KAZINFORM – Memleket basshysy ult perzenti, asa kórnekti aqyn, belgili qoǵam qaıratkeri, Halyq jazýshysy, Qazaqstannyń Eńbek Eri Muhtar Shahanovtyń otbasy men jaqyn týystaryna kóńil aıtý jedelhatyn joldady, dep habarlady Aqorda.
– Muhtar Shahanov bar ǵıbratty ǵumyryn qasterli sóz ónerine arnap, qazaq poezııasyn jańa beleske kótergen, tól ádebıetimiz ben mádenıetimizdiń kókjıegin keńeıtýge eleýli úles qosqan qoǵamymyzdyń tuǵyrly tulǵasy edi. Árqashan til janashyry retinde ıgilikti isterdiń bastaýynda boldy. Shyǵarmalary kóptegen shet tilderine tárjimalandy, jalyndy jyrlaryn qalyń oqyrman súıip oqydy. Ónegeli ómir súrip, sońyna mol ádebı mura qaldyrǵan Muhtar Shahanovtyń jarqyn beınesi halqymyzdyń jadynda máńgi saqtalady, – delingen jedelhatta.
Aıta keteıik, buǵan deıin Halyq jazýshysy Muhtar Shahanovtyń ómirden ótkeni habarlanǵan bolatyn.
