Qasym-Jomart Toqaev Mońǵolııaǵa barady
ASTANA. KAZINFORM - Qasym-Jomart Toqaev Mońǵolııa Prezıdenti Ýhnaagıın Hýrelsýhpen kezdesti. Qazaqstan Prezıdenti «ShYU plıýs» formatyndaǵy otyrystyń tabysty ótýine konstrýktıvti úles qosqany úshin Ýhnaagıın Hýrelsýhqa rızashylyǵyn bildirdi.
Memleket basshysynyń aıtýynsha, Mońǵolııa – elimizdiń Azııadaǵy eń mańyzdy seriktesteriniń biri.
Bizdi ǵasyrlar qoınaýynan tamyr tartatyn ortaq mádenı-tarıhı qundylyqtar men dástúrler baılanystyrady.
– Qazaqstan men Mońǵolııanyń yntymaqtastyǵy ózara qurmet pen qoldaý rýhynda udaıy nyǵaıyp keledi. Elderimiz arasynda senimdi jáne syndarly saıası dıalog jolǵa qoıylǵan. Aýqymdy sharttyq-quqyqtyq baza qalyptasqan, mádenı-gýmanıtarlyq baılanystar keńeıýde. Oraıly sátti paıdalanyp, Qazaqstandaǵy buryn-sońdy bolmaǵan sý tasqyny kezinde qoldaý kórsetkenderińiz úshin Sizge jáne barsha mońǵol halqyna rızashylyǵymdy bildiremin, – dedi Qasym-Jomart Toqaev.
Kezdesý barysynda saýda-ekonomıkalyq yntymaqtastyq, taýar aınalymyn ulǵaıtý, kólik-tranzıt áleýetin arttyrý perspektıvalary talqylandy.
Prezıdenttiń aıtýynsha, qolda bar múmkindikterdi tolyq paıdalaný úshin eki el úkimetteri saýda-ekonomıkalyq yqpaldastyqtyń jańa baǵyttaryn izdegeni jón.
– Qazaqstannyń Mońǵolııaǵa shıkizattyq emes taýarlar boıynsha eksporttyq áleýeti shamamen 100 mıllıon dollardy quraıdy. Osyǵan oraı taýar aınalymyn 500 mıllıon dollarǵa deıin ulǵaıtý jóninde naqty maqsat qoıýdy usynamyn. Bul rette biz Qazaq-mońǵol iskerlik keńesin qurýǵa jáne Saýda-ekonomıkalyq yntymaqtastyqty jandandyrý jónindegi jol kartasyn qabyldaýǵa múddelimiz, – dedi Prezıdent.
Qasym-Jomart Toqaev Qazaqstan men Mońǵolııa arasyndaǵy áýe reısteriniń sanyn arttyrý qajet ekenin aıtty.
Sondaı-aq eki el arasyndaǵy jol júrý ýaqytyn edáýir qysqartatyn avtomobıl jolyn salý múmkindigin qarastyrýǵa shaqyrdy.
Mońǵolııa Prezıdenti Qazaqstandaǵy saıası jáne áleýmettik-ekonomıkalyq reformalardyń nátıjesin joǵary baǵalady.
Sondaı-aq Astananyń halyqaralyq arenadaǵy róli nyǵaıyp kele jatqanyn atap ótti. Onyń aıtýynsha, eki el ortaq qundylyqtar men tarıhı tamyrlastyqqa negizdelgen kópjaqty yntymaqtastyqty damytýǵa tıis.
Ýhnaagıın Hýrelsýh Qasym-Jomart Toqaevty Mońǵolııaǵa memlekettik saparmen kelýge shaqyrdy.
Qazaqstan Prezıdenti bul shaqyrýdy zor yqylaspen qabyl alatynyn aıtty. Onyń pikirinshe, aldaǵy sapar ekijaqty qatynastardyń jylnamasyndaǵy jańa kezeńge jol ashady.
Budan bólek, eki el basshylary kópjaqty qurylymdar aıasyndaǵy yqpaldastyq máseleleri jóninde pikir almasty.
