Qasym-Jomart Toqaev Mońǵolııa Prezıdentin Naadam merekesimen quttyqtady

ASTANA. KAZINFORM – Qasym-Jomart Toqaev Mońǵolııa Prezıdenti Ýhnaagıın Hýrelsýhti Naadam merekesimen quttyqtady. Bul týraly Aqordanyń baspasóz qyzmeti habarlady. 

Memleket basshysy meıirimdilik pen qaıyrymdylyq qundylyqtaryn dáripteıtin tarıhy tereń bul meıramda Mońǵolııa halqynyń bereke-birligi arta berýine tilektestik bildirdi. Sondaı-aq dostas eki el arasynda qalyptasqan ózara qurmet pen strategııalyq seriktestik ortaq ıgilik úshin odan ári bekı túsetinine kámil senetinin jetkizdi.  

Aıta ketelik, Mońǵolııada bıyl Naadam 10–17 shilde aralyǵynda atalyp ótedi. El Úkimeti bul týraly sheshimdi 4 maýsym kúni qabyldady.

Atap aıtqanda, Naadamǵa arnalǵan demalys kúnderi 10 shildede bastalyp, segiz kúnge sozylady. Bul sheshim azamattardyń usynystary men ótinishterine saı qabyldanǵan. Maqsat — merekeni keń kólemde atap ótýge múmkindik berý, ishki týrızmdi qoldaý jáne jumys pen jeke ómir arasyndaǵy tepe-teńdikti saqtaý.

Aıta keteıik, Naadam — Mońǵolııadaǵy eń iri ári mańyzdy ulttyq mereke. Onyń ataýy «oıyn-saýyq» nemese «oıyndar» degen maǵyna beredi. Bul mereke ejelden beri mońǵol halqynyń táýelsizdigi men birliginiń sımvoly retinde toılanyp keledi.

Eske salsaq, Qazaqstan men Mońǵolııa arasyndaǵy jol qashyqtyǵy 800 shaqyrymǵa deıin qysqaratyny týraly jazǵan edik.