Qasym-Jomart Toqaev «Meıirim» ordenin taǵaıyndady

ASTANA. KAZINFORM — Bul týraly Memleket basshysy Qasym-Jomart Toqaev «Altyn sapa» jáne «Paryz» syılyǵynyń laýreattaryn, «Qazaqstannyń úzdik taýary» respýblıkalyq kórme-konkýrsynyń jeńimpazdaryn marapattaý rásiminde aıtty.

Qasym-Jomart Toqaev «Meıirim» ordenin taǵaıyndaý týraly sheshim qabyldaǵanyn aıtty

— Búgin elimizdiń bıznes qaýymdastyǵy úshin óte mańyzdy kún deýge bolady. Biz bıyl da qalyptasqan dástúrge saı «Altyn sapa», «Paryz», «Qazaqstannyń úzdik taýary» baıqaýlarynyń jeńimpazdaryn marapattap jatyrmyz. Barshańyzdy shyn júrekten quttyqtaımyn!

Osy jerdegi ár kásipkerdiń jetistigi — el mereıiniń aıqyn kórinisi. Sizder sapaly ónim óndirip, ekonomıkany damytýǵa jáne halyqtyń ál-aýqatyn arttyrýǵa zor úles qosyp kelesizder. Áleýmettik jaýapkershilikti tereń sezinip, qaıyrymdylyq isterge belsene atsalysyp júrsizder. Bul — óz kásibine adal, isker jáne naǵyz otanshyl azamattarǵa tán asyl qasıet dep sanaımyn. Memleket Sizderge árdaıym qoldaý kórsetýge daıyn, — dedi ol.

Bıyldan bastap 29 qazan «Qazaqstan kásipkerleri kúni» bolyp resmı túrde bekitildi.

— Sonymen qatar men joǵary áleýmettik jaýapkershilik tanytyp, qaıyrymdylyq isterge mol úles qosqany úshin elimizdiń úzdik kásipkerlerine beriletin arnaıy marapat — «Meıirim» ordenin taǵaıyndaý týraly sheshim qabyldadym. Kelesi jyldan bastap zalda otyrǵan birqatar kásipker osy mártebeli ordenmen marapattalady. Bul elimizdegi barsha bıznes ókilderine degen aıryqsha qurmettiń belgisi bolmaq, — dedi Prezıdent.

Budan buryn Prezıdent ınflıatsııany turaqtandyrýdy Úkimettiń ózekti mindeti retinde atady.