Qasym-Jomart Toqaev Mercedes-Benz Group basshysymen kezdesti
Memleket basshysy Qasym-Jomart Toqaev Mercedes-Benz Group kompanııasynyń basqarma tóraǵasy Ola Kallenıýspen kezdesti, dep habarlaıdy QazAqparat.
«Mercedes-Benz markasy joǵary sapasymen álemge tanymal. Ol bizdiń elimizde erekshe baǵalanady. Kompanııa Germanııadaǵy, Qytaıdaǵy jáne Majarstandaǵy zaýyttaryn jańǵyrtýǵa aýqymdy ınvestıtsııa quıǵan. Avtomobıl qurastyrý ónerkásibi Qazaqstanda da belsendi damyp keledi. Qazirgi tańda elimizde álemge tanymal General Electric, General Motors, Chevrolet brendteri, sondaı-aq koreılik jáne qytaılyq kompanııalar tabysty jumys istep jatyr», - dedi Qasym-Jomart Toqaev.
Prezıdent byltyr Qazaqstanda óndirilgen avtomobılder sany 100 myńnan asyp, 28 paıyzǵa ulǵaıǵanyn atap ótti. Eksport eki ese ósip, 3,8 mıllıard dollarǵa jetken.
«Biz sizdiń kompanııanyń Qazaqstan naryǵyna uzaq jyldan beri qyzmet etip kele jatqanyn oń baǵalaımyz. Eger aldaǵy ýaqyttaǵy seriktestik týraly qandaı da bir usynystar nemese máseleler bosla, tyńdaýǵa daıynbyz. Búgingi kezdesýge Úkimettiń túrli salaǵa jaýap beretin ókilderi de qatysyp otyr», - dedi Memleket basshysy.
Óz kezeginde Ola Kallenıýs Qazaqstan Prezıdentine Berlin Global Dialogue forýmyna arnaıy kelgeni úshin alǵys bildirdi.
«Rahmet, Prezıdent myrza. Mercedes-Benz ókilderimen kezdesýge ýaqyt bólgenińiz úshin, sondaı-aq Berlin Global Dialogue forýmyna qatysý úshin arnaıy kelgenińiz úshin alǵys aıtamyn. Bul álemniń túkpir-túkpirinen jınalǵan bıznesmender men saıasatkerlerdiń basyn qosyp, álemdegi mol múmkindikterdi talqylaıtyn jańa alań. Elimizdiń joǵary áleýetin eskere otyryp, Qazaqstannyń keleshegi zor naryq ekenine eshqandaı shúbámiz joq. Qazaqstan tarapymen buǵan deıin bas dıstrıbıýtorlyq kelisim jasadyq», - dedi O. Kallenıýs.
Osyǵan deıin Qazaqstan men Germanııa Prezıdentteri kópjaqty yntymaqtastyqty nyǵaıta túsýge ýaǵdalasqany týraly jazdyq.
Eske salsaq, keshe QR Prezıdenti Qasym-Jomart Toqaevtyń Germanııa Federatıvtik Respýblıkasyna resmı sapary bastaldy.
Prezıdent Germanııa Kantsleri Olaf Sholtstiń vedomstvosyna baryp, betpe-bet formatynda kelissóz júrgizdi.
Kelissózderden keıin tilshilerge bergen baspasóz máslıhatynda Prezıdent Qazaqstannyń Reseımen ekijaqty tarapta jáne tıisti ıntegratsııalyq birlestikter sheńberinde turaqty dostyq qarym-qatynasta ekenin aıtty.
Ýkraınadaǵy jaǵdaıǵa qatysty Qazaqstannyń ustanymy jóninde pikir bildirdi. Ózara aıyptaýlardy toqtatyp, iskerlik kelissózder júrgizýge shaqyrdy.
Qazaqstan men Germanııanyń iri jáne orta bıznesteri arasynda mańyzdy kommertsııalyq kelisimder bekitildi.
Memleket basshysy Germanııanyń Federaldyq kantslerimen keńeıtilgen quramda kelissóz júrgizdi. Prezıdent júrgizilgen kelissózder qazaq-german qatynastaryn odan ári nyǵaıtýǵa eki taraptyń nıetti ekenin taǵy da rastaǵanyn atap ótti.
