Qasym-Jomart Toqaev Memleket basshysy retindegi myzǵymas basymdyǵyn atady

ASTANA. KAZINFORM – Ustazdyq – jaı mamandyq emes, bul – uly mıssııa. Bul týraly elordada ótip jatqan ustazdardyń respýblıkalyq tamyz konferentsııasynda Memleket basshysy Qasym-Jomart Toqaev aıtty. 

– Álem tarıhynda bilim-ǵylymdy basty orynǵa qoıyp, damýdyń dańǵyl jolyna túsken, orasan zor tabysqa jetken elder az emes. Bilim men ǵylym Qazaqstan damýynyń qozǵaýshy kúshi bolýǵa tıis. Aldaǵy jyldary osy mindetti oryndaýǵa bar kúsh-jigerimizdi salyp jumys isteýimiz kerek. Bul – Memleket basshysy retinde men úshin myzǵymas basymdyq, - dedi Qasym-Jomart Toqaev.

Prezıdent Qazaqstan ustazdarynyń qajyrly eńbegin joǵary baǵalaıtynyn, jas býynǵa berip jatqan bilimniń kúshine senetinin basa aıtty.

– Shyn máninde, ustazdyq – jaı mamandyq emes, bul – uly mıssııa. Adam qandaı jetistikke jetip, bıikke shyqsa da, ustazynyń aldynda ómir boıy shákirt bolyp qalady. Qazaqstannyń jarqyn bolashaǵy Sizderdiń tabandy eńbekterińizge tikeleı baılanysty. Sebebi, sizder tutas ultty oqytyp, tárbıelep jatsyzdar. Osy jaýapkershilikti tereń sezinip, qasterli mindetti abyroımen atqara beresizder dep senemin. Sizderdiń eńbekterińiz eń joǵary qurmetke laıyq, - dedi Memleket basshysy.

Qasym-Jomart Toqaev búgingi Tamyz konferentsııasyna oraı bir top ustazdy memlekettik nagradalarmen marapattaý týraly Jarlyqqa qol qoıǵanyn, bes muǵalimge «Qazaqstannyń eńbek sińirgen ustazy» qurmetti ataǵy beriletinin atap ótti. 

– Barshańyzǵa qutty bolsyn! Jumystaryńyzǵa sáttilik tileımin! Kózi ashyq, kókiregi oıaý, oıy ushqyr shákirtterińiz kóbeıe bersin! Jańa oqý jyly tabysty bolsyn!, - dep túıindedi sózin Prezıdent.

Memleket basshysynyń paıymynsha, muǵalimder memlekettik mańyzy bar jumysty atqaryp jatyr. 

Degenmen ustazdyń nazary bala oqytý isinde bolýǵa tıis.

Sonymen qatar Qasym-Jomart Toqaev mektepten tys jerde oqys oqıǵa bolsa, oǵan ustaz jaýapty emestigin basa aıtty.