Qasym-Jomart Toqaev Majarstan Prezıdentin birinshi dárejeli «Dostyq» ordenimen marapattady
ASTANA. KAZINFORM — Qazaqstan men Majarstan barlyq salada ashyq ári ózara senimge negizdelgen baılanys ornatty. Bul týraly Aqordada elimizge resmı saparmen kelgen Majarstan Prezıdenti Tamash Shýıokpen kelissózderden keıingi BAQ ókilderine arnalǵan brıfıngte Memleket basshysy Qasym-Jomart Toqaev aıtty.
— Prezıdent myrza búgin Astanada ótken Digital Bridge halyqaralyq forýmyna arnaıy kelip qatysty. Sol úshin shynaıy rızashylyǵymdy bildiremin. Jasandy ıntellekt jónindegi oı-pikirlerińiz ben bastamalaryńyzdy joǵary baǵalaımyn. Biz tamyry bir aǵaıyn jurtpyz. Majarstan — Qazaqstannyń táýelsizdigin alǵash moıyndaǵan eldiń biri. Sondaı-aq bizben strategııalyq áriptestik ornatqan Eýropa odaǵyndaǵy tuńǵysh memleket. Qazaqstan egemen el retindegi alǵashqy Elshiligin Býdapesht qalasynda ashqan bolatyn. Búginde elderimiz arasyndaǵy saıası dıalog joǵary deńgeıde júrip jatyr. Memleketterimiz barlyq salada ashyq ári ózara senimge negizdelgen baılanys ornatty, — dedi Prezıdent.
Memleket basshysynyń atap ótýinshe, saýda-ekonomıkalyq jáne ınvestıtsııa salasyndaǵy yntymaqtastyq nyǵaıyp keledi. Eki eldiń qarym-qatynasyna arqaý bolǵan sharttyq-quqyqtyq negiz qalyptasty. Halyqaralyq uıymdar aıasyndaǵy yqpaldastyq keńeıdi.
— Byltyr qarashada Býdapeshtke jasaǵan memlekettik saparymnyń qorytyndylary osynyń aıqyn dáleli. Myzǵymas dostyq pen ózara qoldaýǵa negizdelgen seriktestigimiz aldaǵy ýaqytta da tabysty bolady dep senemin. Osy oń úrdiske Majarstan Prezıdentiniń qosqan eleýi úlesin óte joǵary baǵalaımyn. Sondyqtan búgin joǵary mártebeli Prezıdent Tamash Shýıokty birinshi dárejeli «Dostyq» ordenimen marapattaý men úshin úlken mártebe boldy, — dedi Qasym-Jomart Toqaev.
Aıta keteıik, Qasym-Jomart Toqaev majarlyq áriptesimen keńeıtilgen quramdaǵy kelissóz barysynda Qazaqstanda birlesken jobalardy iske asyrýǵa nıetti majarlyq kásipkerlerge tolyq qoldaý kórsetiletindigin aıtqan bolatyn.