Qasym-Jomart Toqaev Laos Prezıdenti Thonglýn Sısýlıtti elorda áýejaıynan shyǵaryp saldy
ASTANA. KAZINFORM- Memleket basshysy Qasym-Jomart Toqaev Qazaqstanǵa resmı sapary aıaqtalǵan Laos Prezıdenti Thonglýn Sısýlıtti elorda áýejaıynan shyǵaryp saldy, dep habarlaıdy Aqordanyń baspasóz qyzmeti.
Aıta keteıik, Qasym-Jomart Toqaev Laos basshylyǵynyń elimizge alǵashqy saparyn mańyzdy qadam retinde baǵalady.
— Eń aldymen meniń shaqyrýymdy qabyl alyp, Qazaqstanǵa resmı saparmen kelgenińiz úshin ózińizge shynaıy alǵysymdy, rızashylyǵymdy bildiremin. Bul — Laos basshylyǵynyń elimizge jasaǵan alǵashqy, tuńǵysh sapary. Muny biz mańyzdy qadam dep qabyldaımyz. Bul sapardyń mán-maǵynasy erekshe, aıryqsha dep aıtýǵa bolady. Osy tarıhı sapar elderimizdiń yntymaqtastyǵyn nyǵaıtýǵa tyń serpin bereri sózsiz, — dedi Prezıdent keńeıtilgen quramdaǵy kelissózder barysynda.
Sondaı-aq Qazaqstan Prezıdenti Laos kompanııalaryna Qazaqstan naryǵyna shyǵýdyń tıimdi jolyn usyndy.
— AHQO bıznes ashý men ınvestıtsııa tartýdyń halyqaralyq alańyna aınaldy. Onda álemniń 90-nan asa elinen kelgen 6300-den astam kompanııa tirkelgen. AHQO platformasy arqyly Qazaqstanǵa 27 mıllıard dollar ınvestıtsııa tartyldy. AHQO Laos kompanııalary úshin Qazaqstan naryǵyna shyǵatyn ári Ortalyq Azııadaǵy qyzmetin keńeıtetin tıimdi qural bola alady, — dedi ol.
Laos Prezıdenti Qazaqstannyń mamandar daıarlaýǵa kórsetken qoldaýyn joǵary baǵalady.
Sapar sońynda Laos Prezıdenti Qazaqstan Respýblıkasynyń Ulttyq mýzeıin aralap kódi.
