Qasym-Jomart Toqaev Laos basshylyǵynyń elimizge alǵashqy saparyn mańyzdy qadam retinde baǵalady
ASTANA. KAZINFORM — Qazaqstan Laosty Ońtústik-Shyǵys Azııadaǵy mańyzdy seriktes retinde qarastyrady. Bul týraly Laos Prezıdenti Thonglýn Sısýlıtpen keńeıtilgen quramdaǵy kelissóz barysynda Memleket basshysy Qasym-Jomart Toqaev aıtty.
— Eń aldymen meniń shaqyrýymdy qabyl alyp, Qazaqstanǵa resmı saparmen kelgenińiz úshin ózińizge shynaıy alǵysymdy, rızashylyǵymdy bildiremin. Bul — Laos basshylyǵynyń elimizge jasaǵan alǵashqy, tuńǵysh sapary. Muny biz mańyzdy qadam dep qabyldaımyz. Bul sapardyń mán-maǵynasy erekshe, aıryqsha dep aıtýǵa bolady. Osy tarıhı sapar elderimizdiń yntymaqtastyǵyn nyǵaıtýǵa tyń serpin bereri sózsiz, — dedi Prezıdent.
Memleket basshysy kelesi jyly Qazaqstan men Laos arasyndaǵy dıplomatııalyq qarym-qatynas ornaǵanyna 30 jyl tolatynyn eske saldy.
— Ótken jyldar ishinde elderimiz arasyndaǵy baılanystar turaqty ári dostyq sıpatqa ıe boldy. Qazaqstan Laosty Ońtústik-Shyǵys Azııadaǵy mańyzdy seriktes retinde qarastyrady. Bizdi dástúrli dostyq, ózara qurmet pen túsinistikke negizdelgen qarym-qatynastar baılanystyrady. Osy múmkindikti paıdalana otyryp, Sizdi qańtar aıyndaǵy Laos Halyqtyq Revolıýtsııalyq partııasynyń 12-shi seziniń, sondaı-aq aqpan aıynda bolǵan Parlament saılaýynyń tabysty ótýimen shyn júrekten quttyqtaımyn. Laos basshylyǵynyń jańa ekonomıkalyq tetik saıasaty aıasynda dáıekti ákimshilik jáne áleýmettik-ekonomıkalyq reformalardy iske asyrýdaǵy, naryqtyq ekonomıkanyń turaqty damýyn qamtamasyz etýdegi jetistikterin joǵary baǵalaımyz, — dedi Qasym-Jomart Toqaev.
Buǵan deıin Qasym-Jomart Toqaev Táýelsizdik saraıynda elimizge resmı saparmen kelgen Laos Prezıdentin qarsy alǵanyn jazǵan edik.
