Qasym-Jomart Toqaev Kýveıt Memleketiniń jańa Ámirin quttyqtady

Prezıdent Qasym-Jomart Toqaev sheıh Mıshaal ál-Ahmad ál-Djaber as-Sabahty Kýveıt Memleketiniń Ámiri laýazymyna taǵaıyndalýymen quttyqtap, jedelhat joldady, dep habarlaıdy Aqordanyń baspasóz qyzmeti. 

– Taqqa otyrýyńyz týraly sheshimdi Kýveıttiń órkendeýi men múddesin qamtamasyz etýge uzaq jyldar boıy sińirgen Sizdiń rııasyz qyzmetińizge áýletińiz ben otandastaryńyzdyń bergen joǵary baǵasy ári elińizdiń ıgiligi jolyndaǵy bolashaq jeńisterińizge degen nyq seniminiń aıǵaǵy dep bilemin. Qazirgi tańda Kýveıt – irgesi berik, ekonomıkasy áleýetti, halqynyń ál-aýqaty jyldan jylǵa artyp kele jatqan el. Sondaı-aq onyń halyqaralyq qaýymdastyqtaǵy mereıi ústem. Osy rette Sizdiń basshylyǵyńyzben memleketińizdiń damýy baıandy bolyp, ıgi maqsat-murattarǵa jete berýine tilektespin, – dep jazylǵan jedelhatta.

Memleket basshysy Kýveıt Ámiriniń asa jaýapty qyzmeti men barlyq bastamalaryna mol tabys, al baýyrlas Kýveıt halqyna baq-bereke tiledi.