Zań sapasy, ýádeni oryndaý, el damýy: Toqaev Quryltaı depýtattaryna úsh talap qoıdy
ASTANA. KAZINFORM – Jańa Quryltaı depýtattary eń aldymen zańdardyń sapasyna, halyqqa bergen ýádeleri men ázirlengen baǵdarlamalardyń oryndalýyna jaýapty bolady. Bul týraly Prezıdent Qasym-Jomart Toqaev Táýelsizdik saraıynda ótken brıfıngte málim etti.
– Quryltaı iske kiriskennen keıingi ózgeristerge toqtalsańyz. Sizdiń oıyńyzsha, jańa zań shyǵarýshy organ birinshi kezekte qandaı zańdardy qabyldaıdy? Quryltaı depýtaty qandaı qasıetke ıe bolýy kerek? Onyń saılaýshylar aldyndaǵy jaýapkershiligi qandaı?, – dep suraq qoıdy jýrnalıst.
Prezıdent alǵashqy bir palataly Parlament saılaýynyń tarıhı máni zor ekenin atap ótti.
– Quryltaı saılaýyna úlken úmit artamyn. Elimizdiń damýyna tyń serpin beredi dep sanaımyn. Jańa tulǵalar men jańa ıdeıalar paıda boldy. Jastardyń oı-pikirin erkin jetkizýin, memleketimizdiń qalyptasýyna úles qosýyn árdaıym qoldaımyn. Depýtattar, eń aldymen, zańnyń sapasyna jaýap beredi dep senemin, – dep jaýap berdi Memleket basshysy.
Ekinshiden, olar (Quryltaı depýtattary – red.) bergen ýádelerin nemese baǵdarlamalaryn oryndaýǵa tıis.
– Úshinshiden, el damýyna yqpal etetin zańdar qabyldanýy kerek. Qazir zaman kúrdeli. Bizdiń Qazaqstannan basqa Otanymyz joq. Sondyqtan týǵan elimizdi ozyq, zamanaýı memleketke aınaldyrý jolynda kúsh-jigerimizdi biriktirý kerek. Bul rette Konstıtýtsııa bizge mol múmkindik beredi. Birtutas el bolyp qabyldaǵan Jańa Konstıtýtsııamyz óte ozyq, mazmundy qujat dep aıtsaq, qatelespeımiz. Sondyqtan Ata Zań bizge, ásirese, jastarǵa jarqyn jol nusqaıdy. Keleshegimiz – jastardyń qolynda. Oǵan kúmán joq, – dedi Qasym-Jomart Toqaev.
Aıta keteıik, búgin elimizdiń barlyq óńirinde Quryltaı depýtattaryn saılaý bastaldy. Daýys berý 10 423 saılaý ýchaskesinde ótedi.
Memleket basshysy Qasym-Jomart Toqaev Táýelsizdik saraıynda ornalasqan №520 saılaý ýchaskesinde daýys berdi.
Buǵan deıin Prezıdent «Vıtse-prezıdent kim bolady?» degen suraqqa jaýap bergen edi.
