Qasym-Jomart Toqaev: Kitap oqý úrdisi ulttyń ozyq qasıetine aınalǵany jón
ASTANA. KAZINFORM — Bul týraly Memleket basshysy Qasym-Jomart Toqaev ǵalymdardy marapattaý rásiminde aıtty.
— Jaqynda AQSh sottarynyń biri shyǵarǵan sheshimge sáıkes, keıbir ınternet-platformalardyń algorıtmi balalarǵa zııan keltirip, psıhologııalyq turǵydan táýeldi etetini moıyndaldy.
Biz budan sabaq alýǵa tıispiz. Sondyqtan urpaq tárbıesin áleýmettik jeliler men vıdeoservısterdiń bodaýyna berip qoıýǵa bolmaıdy. Bul qosymsha zertteýdi qajet etpeıtin fakt.
Otbasy ınstıtýty men bilim berý júıesin nyǵaıtý, shyn máninde, balalardy kitap oqýǵa baýlýmen tyǵyz baılanysty. Jalpy, osylaı bolýy qajet. Qansha jerden pessımıstik pikirler aıtylsa da, kitap — bilim bulaǵy ári tálimger retinde mańyzyn joıa qoıǵan joq, — dedi Prezıdent.
Memleket basshysy elimiz Ulttyq kitap kúnin ekinshi ret atap ótetinin atap ótti.
— Kitap oqyǵan saıyn tanymyń tereńdeıdi. Kitap aqyl-oıdy shyńdap, dúnıetanymyńdy keńeıtetini, adamdardyń óz qarym-qabiletine degen senimin kúsheıtetini belgili.
Taıaýda elimiz Ulttyq kitap kúnin ekinshi ret atap ótedi. Jurtshylyqtyń qoldaýyna ıe bolǵan bul bastama otandyq baspa salasynyń jumysyn júıelep, sheteldik avtorlardyń ózekti, paıdaly kórkem shyǵarmalarynyń aýdarylýyna túrtki bolýǵa tıis.
Kitap oqý úrdisi tól dúnıetanymymyzdyń ajyramas bóligine, ulttyń ozyq qasıetine aınalǵany jón. Ǵalymdar bul iske salmaqty úles qosýǵa mindetti dep sanaımyn, — dedi ol.
Aıta ketelik Prezıdent ǵylym qalashyqtaryn damytý máselelerine nazar aýdarǵan edi.
