Qasym-Jomart Toqaev Qostanaı oblysynyń 90 jyldyǵyna oraı quttyqtaý joldady
ASTANA. KAZINFORM — Memleket basshysy Qasym-Jomart Toqaev Qostanaı oblysynyń qurylǵanyna 90 jyl tolýyna arnalǵan saltanatty is-sharaǵa qatysýshylardy quttyqtady.
Aqordanyń baspasóz qyzmetiniń habarlaýynsha, Prezıdent óz quttyqtaýynda Qostanaı óńirin yrysy mol, yntymaǵy jarasqan tarıhı ólke dep atap ótti.
— Osy ýaqyt aralyǵynda óńir ósip-órkendep, astyqty aımaqqa aınaldy. Bereke men birliktiń, kelisim men tatýlyqtyń altyn besigi retinde tanyldy, — dedi Qasym-Jomart Toqaev.
Memleket basshysy Qostanaı jeriniń el tarıhyndaǵy orny erekshe ekenin atap ótip, bul óńirden ult rýhanııatyna zor úles qosqan Ybyraı Altynsarın, Ahmet Baıtursynuly, Beıimbet Maılın syndy tulǵalar shyqqanyn aıtty.
Prezıdenttiń sózinshe, búginde oblys ekonomıkasy qarqyndy damyp, turǵyndardyń eńbegi arqasynda óńir jańa jetistikterge qol jetkizip keledi.
— Qostanaı jurty árdaıym aýyzbirshiliktiń ozyq úlgisin kórsetip keledi. Aımaq halqynyń naýryz aıynda ótken respýblıkalyq referendýmǵa belsene qatysyp, jańa Konstıtýtsııany qoldap daýys berýi — sonyń aıqyn kórinisi, — dedi ol.
Qasym-Jomart Toqaev oblysty damytýǵa úles qosyp júrgen azamattarǵa rızashylyǵyn bildirip, qostanaılyqtardy Ádiletti Qazaqstandy qurý jolyndaǵy bastamalardy júzege asyrýǵa belsendi atsalysýǵa shaqyrdy.
— Barshańyzǵa zor densaýlyq, baq-bereke tileımin! Tobyl-Torǵaı ólkesi órkendeı bersin! — dedi Memleket basshysy.
Eske salaıyq, buǵan deıin Qasym-Jomart Toqaev Korol VI Muhammed pen onyń otandastaryn Marokko Koroldiginiń tól merekesi – Taqqa otyrǵan kúnimen quttyqtaǵan edi.
