Qasym-Jomart Toqaev Korol Vıllem-Aleksandrdy Nıderlandtyń ulttyq merekesimen quttyqtady
ASTANA. KAZINFORM – Memleket basshysy jedelhatta Korol kúni merekesinde kórinis tapqan ulttyq yntymaq pen birlik qundylyqtarynyń arqasynda Nıderland aldaǵy ýaqytta da ósip-órkendeı beretinine senim bildirdi. Bul týraly Aqordanyń baspasóz qyzmeti habarlady.
– Qazaqstan – gollandyqtardyń óneri men mádenıetinde tamyr jaıǵan qyzǵaldaqtyń túp otany. Búginde ol halyqtarymyz arasyndaǵy dostyqtyń sımvolyna aınaldy. Biz Nıderlandpen aradaǵy ýaqyt tezinen ótken qarym-qatynasty joǵary baǵalaımyz ári qos halyqtyń ıgiligi úshin túrli saladaǵy seriktestikti odan ári nyǵaıtýǵa beıilmiz, – delingen hatta.
Qasym-Jomart Toqaev Vıllem-Aleksandrdyń ıgi bastamalaryna tabys, sondaı-aq Korol otbasy men Nıderland halqyna baq-bereke tiledi.
