Qasym-Jomart Toqaev Koreıa halqyna kóńil aıtty
ASTANA.KAZINFORM - Memleket basshysy Koreıa Prezıdentiniń mindetin atqarýshy Han Dok Sýǵa kóńil aıtý jedelhatyn joldady, dep habarlaıdy Aqordanyń baspasóz qyzmeti.
Qasym-Jomart Toqaev jedelhatta Ońtústik Koreıa elinde bolǵan alapat órt saldarynan kóptegen adamnyń qaza tapqany men tabıǵat apatynyń qorshaǵan ortaǵa tıgizgen zııany týraly sýyt habardy tereń kúızelispen qabyldaǵanyn jetkizdi.
– Osyndaı aýyr sátte qaıǵylaryńyzǵa ortaqtasyp, barsha Koreıa halqyna, baqı bolǵan azamattardyń týystary men jaqyndaryna qaıǵyra kóńil aıtamyn. Jaraqattanǵan adamdardyń tez arada saýyǵyp, otbasylaryna oralýyna tilektespin. Koreı halqynyń tótenshe jaǵdaıdan týyndaǵan qıynshylyqtardy tez arada eńseretinine kámil senemin, – dep jazdy Prezıdent.
Osyǵan deıin Ońtústik Koreıada orman órti saldarynan keminde 18 adam qaza tapqany týraly habarladyq.