Qasym-Jomart Toqaev Kongomen yntymaqtastyqty damytýǵa bolatyn salalardy atady
ASTANA. KAZINFORM – Qazaqstan men Kongo yntymaqtastyǵynyń áleýeti óte joǵary. Bul týraly Aqordada Kongo Respýblıkasynyń Prezıdenti Denı Sassý-Ngessomen keńeıtilgen quramdaǵy kelisóz barysynda Memleket basshysy Qasym-Jomart Toqaev aıtty.
«Sizdiń qazaq jerine alǵashqy saparyńyz eki el arasyndaǵy dıplomatııalyq qarym-qatynastyń 25 jyldyǵymen tuspa-tus kelip otyr. Bul — mereıli meje. Shırek ǵasyr ishinde biz ózara senim men dostyqqa negizdelgen yntymaqtastyq ornattyq. Biz bolashaqta da osy seriktestikti nyǵaıta túskimiz keledi. Búgingi kelissózder Qazaqstan men Kongo qatynastaryn jańa beleske kóterip, tıimdi áriptestik ornatýǵa múmkindik bermek», — dedi Prezıdent.
Memleket basshysy Qazaqstan Kongo Respýblıkasyn Afrıka qurlyǵyndaǵy mańyzdy seriktes retinde qarastyratyndyǵyn atap ótti.
«Eki el bir-birinen qashyqta ornalasqan. Soǵan qaramastan ózara baılanysty jan-jaqty damytýǵa múddelimiz. Qazaqstan men Kongo yntymaqtastyǵynyń áleýeti óte joǵary. Ásirese, saýda-ekonomıka, aýyl sharýashylyǵy, kólik-logıstıka, taý-ken, óndiris pen ınvestıtsııa, jańa tehnologııalar men ǵaryshty ıgerý baǵyttary boıynsha eki el arasyndaǵy yntymaqtastyqty jandandyrýǵa bolady. Búgin qol qoıylatyn qujattar eki el arasyndaǵy yntymaqqa tyń serpin beredi. Biz buǵan dálel retinde Kongodaǵy Elshimizdi taǵaıyndaımyz. Elshi eki eldiń arasynda saıası araaǵaıyn bolady», — dedi Qasym-Jomart Toqaev.
