Qasym-Jomart Toqaev Kongo jastaryna Qazaqstannyń joǵary oqý oryndarynda bilim alýdy usyndy
ASTANA. KAZINFORM – Astana men Brazzavıl arasynda mádenı-gýmanıtarlyq baılanys ornatý óte mańyzdy. Bul týraly Aqordada Kongo Respýblıkasynyń Prezıdenti Denı Sassý-Ngessomen kelissózderden keıingi BAQ ókilderine arnalǵan brıfıngte Memleket basshysy Qasym-Jomart Toqaev aıtty.
«Astana men Brazzavıl arasynda mádenı-gýmanıtarlyq baılanys ornatý óte mańyzdy. Men Kongo jastaryna Qazaqstannyń joǵary oqý oryndarynda bilim alýdy usyndym. Bul qadam yntymaqtastyqty nyǵaıata túseri sózsiz», — dedi Qasym-Jomart Toqaev.
Prezıdent eki el halyqaralyq jáne aımaqtyq deńgeıde tyǵyz qatynas ornatqanyn basa aıtty.
«Kóptegen ózekti máselege qatysty ustanymdarymyz ortaq. Jahandyq jáne óńirlik qurylymdar aıasynda yqpaldastyǵymyz damyp keledi. Qazirgi geosaıası jaǵdaıda BUU jáne Afrıka odaǵy aıasynda ózara qoldaý kórsetý jáne konsýltatsııalar ótkizý asa mańyzdy. Sonymen qatar biz jahandyq jáne aımaqtyq qaýipsizdikke qatysty pikir almastyq. Qazir eń ózekti máseleniń biri — klımattyń ózgerýi. Biz osy qatermen birge kúresip, tyǵyz jumys isteýge kelistik», — dedi Memleket basshysy.
Qasym-Jomart Toqaev Kongo basshysynyń orman ósirýdiń jáne ormandy qalpyna keltirýdiń jahandyq 10 jyldyǵy jarııalaý týraly bastamasyn qoldaıtyndyǵyn aıtty.
«Shyn máninde Sassý-Ngesso myrzanyń elimizge sapary tarıhı mańyzǵa ıe. Bul sapar Qazaqstan men Kongonyń qarym-qatynastaryna tyń serpin beredi dep sanaımyn. Sonymen qatar Ortalyq Azııa men Afrıka arasyndaǵy yntymaqtastyqty nyǵaıta túsýge yqpal eteri sózsiz. Biz bir-birimizdi qoldap, tabysqa birge jetemiz dep senemin. Eki eldiń dostyǵy arta bersin», — dep túıindedi sózsiz Prezıdent.
