Qasym-Jomart Toqaev kólik-logıstıka baılanystaryn nyǵaıtý máselelerine toqtaldy
ASTANA. KAZINFORM — Atap aıtqanda, Prezıdent Transkaspıı halyqaralyq kólik baǵdary (Orta dáliz) jáne EO-nyń Global Gateway bastamasyn ushtastyrý perspektıvasyna nazar aýdardy, sondaı-aq elimizdegi birqatar iri kólik-ınfraqurylym jobasyna eýropalyq seriktesterdiń qoldaý kórsetip otyrǵanyn jetkizdi. Bul týraly Aqordanyń baspasóz qyzmeti habarlady.
Prezıdent Qazaqstanda aıtarlyqtaı mol qory bar asa mańyzdy shıkizat materıaldary salasy yntymaqtastyqty damytýǵa keńinen múmkindik beredi dep sanaıdy.
Elimiz óńdeý ónerkásibine, tehnologııa transferine jáne birlesken óndiristik jobalarǵa eýropalyq ınvestıtsııa tartýǵa nıetti.
Memleket basshysy Qazaqstannyń Eýropalyq Odaqpen energetıka, sonyń ishinde atom, tsıfrlyq transformatsııa, aýyl sharýashylyǵy, sý qaýipsizdigi jáne klımat kún tártibi sekildi baǵyttarda yqpaldastyqty odan ári arttyrýǵa múddeli ekenin rastady.
Qasym-Jomart Toqaev seriktestiktiń taǵy bir mańyzdy salasy retinde bilim berý, ǵylym, mádenıet jáne azamattar arasyndaǵy qarym-qatynas sııaqty gýmanıtarlyq ólshemderdi atady.
– Qazaqstan Erasmus+, Horizon Europe jáne basqa da bilim berý men zertteý baǵdarlamalary aıasyndaǵy yntymaqtastyqtyń artyp kele jatqanyn joǵary baǵalaıdy. Biz aldaǵy ýaqytta da elimizdiń ýnıversıtetteri men eýropalyq joǵary oqý oryndary arasyndaǵy áriptestikke qoldaý kórsetemiz. Qazaqstan Horizon Europe baǵdarlamasy aıasyndaǵy qaýymdastyrylǵan el mártebesin ıelenýge nıetti, – dedi Memleket basshysy.
Prezıdent vızalyq rejımdi jeńildetý jáne readmıssııalaý týraly kelisim jobalary boıynsha kelissózderdiń aıaqtalǵanyna erekshe rızashylyǵyn bildirdi.
Sondaı-aq Qazaqstandaǵy saıası jańǵyrý baǵdarlamasyna dáıekti túrde qoldaý kórsetkeni jáne eýropalyq taraptyń basqarý, ınnovatsııa men ornyqty ekonomıkalyq damý salalaryndaǵy ozyq tájirıbelerimen bólisýge ázirligi úshin EO jetekshilerine alǵys aıtty.
Budan bólek, Qasym-Jomart Toqaev óńiraralyq seriktestikti nyǵaıtýdyń naqty tetigine aınalǵan «Ortalyq Azııa – Eýropalyq Odaq» dıalog platformasy mańyzdy ról atqaratynyna toqtaldy.
