Qasym-Jomart Toqaev Qyrǵyzstannyń birqatar memleket jáne qoǵam qaıratkerin marapattady
ASTANA. KAZINFORM - Memleket basshysynyń Jarlyǵymen Qazaqstan men Qyrǵyzstan arasyndaǵy dostyq jáne odaqtastyq qatynastardy damytýǵa qosqan eleýli úlesi úshin Qyrǵyz Respýblıkasy Mınıstrler kabıneti tóraǵasynyń orynbasary – Memlekettik ulttyq qaýipsizdik komıtetiniń tóraǵasy Kamchybek Tashıev І dárejeli «Dostyq» ordenimen marapattaldy.
Bul týraly Aqordanyń baspasóz qyzmeti habarlady.
Qyrǵyz Respýblıkasynyń VII shaqyrylǵan Jogorký Keneshiniń depýtaty Dastanbek Jumabekov, Qyrǵyzstan Prezıdentiniń keńesshisi Arslan Koıchıev, qoǵam qaıratkeri Askar Salymbekov ІІ dárejeli «Dostyq» ordenimen marapattaldy.
Prezıdent Qyrǵyz Respýblıkasynyń kórnekti memleket qaıratkerleri qajyrly eńbek etip, ekijaqty yntymaqtastyqty damytýǵa zor úles qosyp júrgenin atap ótti.
– Sonyń arqasynda saıası, ekonomıkalyq, mádenı baılanystarymyz nyǵaıyp keledi. Parlamentaralyq yqpaldastyǵymyz da kúsheıe tústi. Osy oraıly sátte men Ulttyq qaýipsizdik memlekettik komıtetiniń tóraǵasy Kamchybek Kydyrshaevıch Tashıevke shynaıy rızashylyǵymdy bildiremin. Siz qaýipsizdik salasyndaǵy ekijaqty áriptestikti tereńdetýge zor úles qosyp jatyrsyz, aımaqtaǵy turaqtylyqty qamtamasyz etý jolynda atqarǵan tabandy eńbegińiz joǵary baǵaǵa laıyq. Búgingi shara – jaı ǵana marapattaý rásimi emes. Bul – Qazaqstannyń Qyrǵyz halqyna degen zor rızashylyǵy men qurmetiniń belgisi. Sondyqtan, bul kún máńgi baýyrlastyq pen tatý kórshiliktiń jarqyn úlgisi retinde qazaq-qyrǵyz qatynasynyń jylnamasyna altyn árippen jazylady dep oılaımyn. Sizder Qyrǵyzstannyń kórkeıýine, sondaı-aq, eki el arasyndaǵy jan-jaqty qarym-qatynasty nyǵaıtýǵa mol úles qosa beresizder dep senemin, – dedi Qasym-Jomart Toqaev.
Osyǵan deıin Prezıdent Sadyr Japarovtyń Bishkek tórindegi búgingi kelissózderdiń qorytyndysy nátıjeli bolǵanyn aıtqany týraly jazdyq.