Qasym-Jomart Toqaev: Qyrǵyz halqy – qazaq halqy úshin baýyrlas el
ASTANA. KAZINFORM – Prezıdent Qasym-Jomart Toqaev Ortalyq Azııa jáne Ázerbaıjan memleketteri basshylarynyń beıresmı Konsýltatıvtik kezdesýine qatysty, dep jazady Aqorda.
Memleket basshysy jıynda sóılegen sózinde dástúrge saı aıryqsha yqylaspen qarsy alǵany jáne beıresmı kezdesýdi ótkizý týraly bastama kótergeni úshin Qyrǵyz Respýblıkasynyń Prezıdenti Sadyr Japarovqa shynaıy rızashylyǵyn bildirdi.
– Qyrǵyz halqy – qazaq halqy úshin baýyrlas el. Biz bárimiz – bir týǵan aǵaıyn halyqpyz. Bizdiń aramyzda qalyptasqan dostyq, senim, týysqandyq jáne ózara qoldaý – ata-babamyzdan ósıet bolyp qalǵan qasıetti amanat ári máńgi qundylyq. Qazirgi tańda biz Qyrǵyzstannyń qarqyndy damýyna kýá bolyp otyrmyz. Sizder qol jetkizip jatqan ár jetistikke shyn júrekten qýanamyz. Qyrǵyz eliniń ósip-órkendeýi – Ortalyq Azııanyń turaqtylyǵy men baıandy damýynyń mańyzdy kepili. Bul qurmetti Prezıdent Sadyr Nurǵojauly Japarovtyń tabandy eńbegi men kóregen basshylyǵynyń arqasy ekeni sózsiz, – dedi Qazaqstan Prezıdenti.
Qasym-Jomart Toqaev búgingi kezdesý qazirgi kún tártibindegi ózekti máselelerdi talqylaýǵa, san qyrly seriktestiktiń aldaǵy basymdyqtaryn aıqyndaýǵa mol múmkindik beretinine toqtaldy.
– Barlyq deńgeıdegi baılanystyń jandanýy baýyrlas halyqtarymyzdyń ıgiligi men tutas aımaqtyń órkendeýi jolynda memleketterimizdiń jasampaz yqpaldastyqqa ortaq umtylysyn aıqyn kórsetedi. Bul oraıda «HHІ ǵasyrda Ortalyq Azııany damytý maqsatyndaǵy dostyq, tatý kórshilik jáne yntymaqtastyq týraly shartqa» qol qoıý rásimderiniń aıaqtalýy aıtýly jetistik boldy. Atalǵan tarıhı qujat strategııalyq seriktestigimizdegi jańa kezeńniń bastalǵanyn aıshyqtaıdy. Ózara senimge, qurmetke jáne baýyrlas halyqtarymyzdyń bolashaǵyna degen ortaq jaýapkershilikke negizdelgen óńirlik yntymaqtastyqtyń «saıası arqaýyn» qalyptastyrady, – dedi Qazaqstan Prezıdenti.
Aıta keteıik, buǵan deıin Memleket basshysynyń Qyrǵyzstannyń Sholpan-Ata qalasyna barǵany habarlandy.
