Qasym-Jomart Toqaev Kıprdi Transkaspıı jáne Orta dáliz jobalaryna atsalysýǵa shaqyrdy
ASTANA. KAZINFORM – Memleket basshysy Qasym-Jomart Toqaev kıprlyq seriktesterdi Transkaspıı dálizi jobasyna atsalysýǵa shaqyrdy. Orta dáliz aıasynda da Qazaqstannyń qurlyqtaǵy jáne Kıprdiń teńizdegi ınfraqurylymyn tıimdi ushtastyrýǵa zor múmkindik bary aıtyldy.
– Jańa ǵana prezıdent Nıkos Hrıstodýlıdıspen mazmundy kelissóz júrgizdik. Yqpaldastyǵymyzdy kúsheıtýdiń jańa baǵyttary týraly áńgimelestik. Ózara saýda-sattyq kólemin arttyrýǵa erekshe nazar aýdardyq. Taýar aınalymyn ulǵaıtý, ınvestıtsııalyq qarym-qatynasty damytý jáne isker toptardyń baılanysyn odan ári nyǵaıtý qajettigin atap óttik. Bul mańyzdy mindet, – dedi Qazaqstan Prezıdenti Kıpr prezıdentimen kelissózderden keıingi BAQ-qa málimdemesinde.
Memleket basshysy Qazaqstan-Kıpr ekonomıkalyq yntymaqtastyǵynyń jol kartasyn ázirleýdi usynǵanyn atap ótti.
Sondaı-aq, Úkimetaralyq komıssııa jáne Іskerlik keńes qurý jónindegi bastamalar kóterilgen. Bul qadam birlesken jobalardy iske asyryp, ózara alys-beristi arttyrýǵa jáne bıznes úshin jańa múmkindikterge jol ashady.
– Biz logıstıka, qarjy, týrızm, tsıfrlyq tehnologııalar salasyndaǵy ózara baılanystarymyzdyń keleshegi zor dep sanaımyz. Úkimetterimizge osy baǵyttar boıynsha naqty sharalar qabyldaý jóninde tapsyrma berýge ýaǵdalastyq, – dedi Qasym-Jomart Toqaev.
Sonymen birge, Prezıdent kıprlyq seriktesterdi Transkaspıı dálizi jobasyna atsalysýǵa shaqyrdy.
– Ózderińiz jaqsy bilesizder, Kıpr – álemdik deńgeıdegi teńiz alyby sanalady. Orta dáliz aıasynda Qazaqstannyń qurlyqtaǵy jáne Kıprdiń teńizdegi ınfraqurylymyn tıimdi ushtastyrýǵa múmkindik zor. Bul qadam Ortalyq Azııa aımaǵy, Kaspıı aımaǵy jáne Jerorta teńizi arasynda jańa kópsalaly logıstıka júıesin qalyptastyrýǵa jol ashady. Sondaı aq, ózara alys-berisimizdi ulǵaıtýǵa múmkindik beredi, – dedi Memleket basshysy.
Aıta keteıik, 2-4 maýsym kúnderi Memleket basshysy Qasym-Jomart Toqaevtyń shaqyrýymen Kıpr Respýblıkasynyń Prezıdenti Nıkos Hrıstodýlıdıstiń Qazaqstanǵa resmı sapary ótedi.
Táýelsizdik saraıynda Qasym-Jomart Toqaev Kıpr prezıdentin saltanatpen qarsy aldy. Kazinform agenttigi eki el arasyndaǵy qarym-qatynastyń negizgi baǵyttaryna sholý jasady.
