Qasym-Jomart Toqaev Kıpr prezıdentin І dárejeli Dostyq ordenimen marapattady
ASTANA. KAZINFORM – Táýelsizdik saraıynda Memleket basshysy Qasym-Jomart Toqaev Kıpr prezıdenti Nıkos Hrıstodýlıdıske І dárejeli Dostyq ordenin tapsyrdy.
Marapat rásiminde Memleket basshysy memleketterdiń yqpaldastyǵyn odan ári bekite túsýge nıetti ekenin, bul barlyǵynyń múddesine saı keletinin aıtty.
– Kıpr Respýblıkasynyń basshysy osy oń úrdiske zor úles qosyp keledi. Men muny joǵary baǵalaımyn. Bul nagrada qazaq eliniń Sizge jáne búkil Kıpr Respýblıkasynyń halqyna degen erekshe qurmetiniń, shynaıy iltıpatynyń belgisi. Elderimizdiń ózara seriktestigi nyǵaıa beredi dep senemin, – dedi Qasym-Jomart Toqaev.
Óz kezeginde N.Hrıstodýlıdıs bul marapatty Kıpr halqynyń atynan qabyldaıtynyn jetkizdi.
– Onyń biz úshin erekshe máni bar. Bul – elderimiz arasyndaǵy dostyqtyń belgisi, al dostyq barlyq memleket úshin asa mańyzdy qundylyq, – dedi N. Hrıstodýlıdıs marapattan keıin.
N.Hrıstodýlıdıs bul qurmet Qazaqstanǵa Kıpr Respýblıkasy prezıdentiniń alǵash ret jasaǵan resmı sapary barysynda kórsetilip otyrǵanyn atap ótti.
– Bul sapar 1992 jyly dıplomatııalyq qatynastar ornatylǵannan bergi mańyzdy tarıhı kezeń bolyp tabylady. Ol bizdiń ortaq umtylysymyzdy, saıası erik-jigerimizdi jáne ekijaqty baılanystardy odan ári nyǵaıtyp, ózara qyzyǵýshylyq týdyratyn salalardaǵy yntymaqtastyqty tereńdetý nıetimizdi aıqyn kórsetedi, – dedi Kıpr prezıdenti.
Aıta keteıik, 2-4 maýsym kúnderi Memleket basshysy Qasym-Jomart Toqaevtyń shaqyrýymen Kıpr Respýblıkasynyń Prezıdenti Nıkos Hrıstodýlıdıstiń Qazaqstanǵa resmı sapary ótedi.
Táýelsizdik saraıynda Qasym-Jomart Toqaev Kıpr prezıdentin saltanatpen qarsy aldy. Kazinform agenttigi eki el arasyndaǵy qarym-qatynastyń negizgi baǵyttaryna sholý jasady.
