Qasym-Jomart Toqaev QHR Tóraǵasy Sı Tszınpınmen kelissóz júrgizdi
Qytaı eliniń basshysy Qazaqstan Prezıdentin Beıjińdegi Halyq jınalysy úıinde qarsy aldy, dep habarlaıdy Kazinform Aqordanyń baspasóz qyzmetine silteme jasap.
Mártebeli meımannyń kelýine oraı Qurmet qaraýyly sap túzep turdy. Sodan keıin memleketter basshylary óz delegatsııalarymen birge Úlken shyǵys zalynda kelissóz júrgizdi.
Qasym-Jomart Toqaev Sı Tszınpınniń «Bir beldeý, bir jol» halyqaralyq yntymaqtastyǵynyń III forýmyna qatysýǵa shaqyrýyn zor yqylaspen qabyl alyp, Qytaıǵa taǵy da saparmen kelgenin atap ótti.
─ Qazaqstan Sizdiń osy jahandyq bastamańyzǵa alǵashqy kúnnen bastap qoldaý bildirdi jáne ony ilgeriletýge belsendi atsalysyp keledi. Osydan týra 10 jyl buryn Astanada sóılegen sózińizde Sizdiń osy bastama týraly aıtqanyńyz esimizde. Oraıly sátti paıdalana otyryp, Sizdi osy megajobany júzege asyrý barysynda keremet nátıjege qol jetkizýińizben quttyqtaımyn jáne aıtýly sharanyń tabysty ótýine tilektestik bildiremin. Sondaı-aq Sizdi Qytaı Halyq Respýblıkasynyń qurylǵanyna 74 jyl tolýymen jáne Hanchjoýda ótken XIX jazǵy Azııa oıyndaryndaǵy Qytaı komandasynyń zor jetistigimen quttyqtaımyn. Biz Qytaıdyń qarqyndy damýyn erekshe yqylaspen baqylap otyrmyz. Sizdiń dana basshylyǵyńyzben Qytaı álemdik jetekshi derjavaǵa aınalýdy kózdegen asqaq muratyna jetýge batyl qadam jasap keledi, – dedi Prezıdent.
Memleket basshysy jan-jaqty ári máńgilik strategııalyq seriktestikke negizdelgen qazaq-qytaı qatynastary qarqyndy damyp kele jatqanyna nazar aýdardy.
– Biz barlyq baǵyt boıynsha tıimdi memleketaralyq yqpaldastyqty jolǵa qoıdyq. Sizdiń byltyr qyrkúıek aıynda Qazaqstanǵa jasaǵan memlekettik saparyńyz ózara baılanystardyń barynsha nyǵaıýyna tyń serpin berdi. Sapar aıasynda elderimiz arasyndaǵy yntymaqtastyqtyń jańa «altyn 30 jyldyǵy» bastaldy. Memleketterimiz arasyndaǵy saýda-sattyq tabysty damyp keledi. Aıtarlyqtaı ósim bar. Investıtsııanyń jalpy kólemi 21 mıllıard dollar bolatyn 52 birlesken joba júzege asyrylyp jatyr. 2024 jyl Qytaıda Qazaqstan týrızmi jyly bolyp jarııalandy. Bul osy sala úshin mol múmkindikterge jol ashady. Ózara mádenı-gýmanıtarlyq baılanystar úshin qolaıly jaǵdaı jasalýda. Memleketaralyq qarym-qatynastardy múldem jańa deńgeıge shyǵarý úshin Qazaqstannyń da, Qytaıdyń da orasan zor áleýeti bar dep sanaımyn. Osy múmkindikti paıdalanyp, qurmetti Tóraǵa Sı Tszınpın, Sizdi kelesi jyly Qazaqstanǵa memlekettik saparmen kelýge shaqyramyn, – dedi Qasym-Jomart Toqaev.
QHR Tóraǵasy shaqyrýyn qabyl alǵany úshin Memleket basshysyna alǵys aıtyp, ózara tıimdi yntymaqtastyqty nyǵaıtý mańyzdy ekenin atap ótti.
– Joǵary deńgeıdegi «Bir beldeý, bir jol» halyqaralyq yntymaqtastyǵynyń III forýmyna qosh keldińiz. Ornyqty ári qarqyndy qazaq-qytaı qatynastary eki el arasyndaǵy ózara senimdi nyǵaıtyp, beıbitshilik pen turaqtylyqty qoldaý isinde batyl áreket etýge septigin tıgizedi. Halyqaralyq jaǵdaıdyń qalaı qubylatynyna qaramastan, Qytaı men Qazaqstan ózderiniń bastapqy ustanymdarynan aınymaı, bir-birine járdemdesedi. Elderimiz arasynda dostyq qatynastar ornaǵan jyldar ishinde biz máńgilik ári jan-jaqty strategııalyq seriktestik qalyptastyra aldyq. «Bir beldeý, bir jol» jobasyn 10 jyl buryn Qazaqstanda kótergen edim, – dedi Sı Tszınpın.
QHR Tóraǵasynyń aıtýynsha, Qytaı Qazaqstannyń egemendigi men aýmaqtyq tutastyǵyn, sondaı-aq Qasym-Jomart Toqaevtyń bastamasymen júzege asyrylyp jatqan aýqymdy reformalardy tolyqtaı qoldaıdy.
Kelissóz barysynda taraptar saýda-ekonomıka, munaı-gaz, munaı hımııasy, energetıka, qarjy, kólik-tranzıt, atom ónerkásibi, mashına jasaý, týrızm, elektrondy kommertsııa jáne joǵary tehnologııa salalaryndaǵy jan-jaqty yqpaldastyqty damytý máselelerin talqylady. Memleketter basshylary birlesken ınvestıtsııalyq jobalardy júzege asyrý, sondaı-aq mádenıetaralyq baılanystarǵa jaǵdaı jasaý mańyzdy ekenine nazar aýdardy.
Budan bólek, memleketter basshylary halyqaralyq jáne óńirlik kún tártibindegi ózekti máseleler jóninde pikir almasty.
