Qasym-Jomart Toqaev Kenııa Prezıdentin 1-dárejeli «Dostyq» ordenimen marapattady

— Qazaqstan men Kenııa arasyndaǵy áriptestikti nyǵaıtýǵa qosqan eleýli úlesińizge baılanysty, qurmetti Prezıdent myrza, Sizge 1-dárejeli «Dostyq» ordenin tabystaý men úshin zor mártebe. Sizdiń eńbegińiz dostyqty beıneleıtin osy marapattyń mánin tolyq aıqyndaıdy. Bul joǵary nagrada — Qazaqstannyń shynaıy qurmeti men rızashylyǵynyń, sondaı-aq senim men ózara syılastyqqa negizdelgen qarym-qatynastardy damytýǵa degen ustanymynyń belgisi, — dedi Qazaqstan Prezıdenti Táýelsizdik saraıynda ótken keńeıtilgen quramdaǵy kelissózderden keıin.

Memleket basshysy barlyq halyqtyń ıgiligi jolyndaǵy osy izgi isti ilgeriletý úshin aldaǵy ýaqytta da kúsh-jiger biriktirýge daıyn ekenin basa aıtty.

— Qurmetti Prezıdent Rýto, eń izgi tilekterim men shynaıy quttyqtaýymdy qabyl alyńyz. Qazaqstan Respýblıkasy men Kenııa Respýblıkasy arasyndaǵy jan-jaqty yntymaqtastyqty nyǵaıtýǵa jáne damytýǵa qosqan eleýli úlesi úshin Kenııa Respýblıkasynyń Prezıdenti, asa mártebeli Ýılıam Semıýel Rýto 1-dárejeli «Dostyq» ordenimen marapattalady, — dedi Qasym-Jomart Toqaev.

Ýılıam Rýto joǵary nagradamen marapattaǵany úshin Memleket basshysyna alǵys aıtty.

– Men birlik, ózara qurmet pen yntymaqty beıneleıtin atalǵan ordenmen marapattalǵanyma qýanyshtymyn. Kenııa jurty da Qazaqstan halqy sııaqty úılesimdi órkendeýge umtylady. Bul elderimizdiń dostyq rýhyndaǵy seriktestigin odan ári nyǵaıtýǵa jol ashady dep senemin, – dedi Kenııa Prezıdenti.

Buǵan deıin Memleket basshysy Qasym-Jomart Toqaevtyń elimizge memlekettik saparmen kelgen Kenııa Respýblıkasynyń Prezıdenti Ýılıam Rýtony Táýelsizdik saraıynda resmı qarsy alý rásimi ótken edi.