Qasym-Jomart Toqaev Qazaqstannyń 7 jyldaǵy negizgi kórsetkishterin atady
ASTANA. KAZINFORM — Memleket basshysy Qasym-Jomart Toqaev sońǵy jeti jylda Qazaqstan ekonomıkasy men áleýmettik salasynda birqatar mańyzdy kórsetkish óskenin aıtty. Belsendi jumystyń nátıjesinde Qazaqstan álemniń básekege qabiletti 40 eliniń qataryna endi.
Prezıdenttiń aıtýynsha, azamattarymyz elimizde júrgizilgen reformalardyń tikeleı kýágeri bolyp, sol ózgeristerdiń naqty nátıjesin kórip otyr.
— Sońǵy 7 jylda jalpy ishki ónim 29 paıyzǵa artyp, 306 mıllıard dollarǵa jetti. Altyn-valıýta rezervi jáne Ulttyq qor aktıvteriniń kólemi 138 mıllıard dollardan asty. Osy kezeńde elimizge 162 mıllıard dollardan astam ınvestıtsııa tartyldy, — dedi Qasym-Jomart Toqaev Qazaqstan Halyq Keńesiniń birinshi sessııasynda.
Elimizde shaǵyn jáne orta bıznestiń ekonomıkadaǵy úlesi 40 paıyzdan asty. Qazaqstanda jyl saıyn 20 mıllıon sharshy metrden astam turǵyn úı boı kóteredi.
2019 jyldan bastap, 1 mıllıonnan astam oqýshyǵa arnalǵan 1342 mektep salyndy.
— Azamattardyń ortasha ómir súrý uzaqtyǵy 76 jasqa jetti. Sondaı-aq 1200-den astam densaýlyq saqtaý nysany ashyldy. Osy ýaqyt ishinde 35 myń shaqyrymnan astam avtokólik joly salynyp, jóndeldi. Munyń bárin tarıhymyzdaǵy eń joǵary kórsetkish deýge bolady. Belsendi jumystyń nátıjesinde Qazaqstan álemniń básekege qabiletti 40 eliniń qataryna endi, — dedi Prezıdent.
Buǵan deıin Prezıdent bir jylda Qazaqstanda eldiń saıası júıesi men memlekettik basqarýyna eleýli ózgeris ákelgen aýqymdy reformalar júzege asqanyn aıtqan edi.
