Qasym-Jomart Toqaev qazaqstandyqtardy Jańa jyl merekesimen quttyqtady

Qazaqstan Respýblıkasynyń Prezıdenti Qasym-Jomart Toqaev qazaqstandyqtardy kelip jetken Jańa jyl merekesimen quttyqtady, dep habarlaıdy Kazinform.

Qadirli Otandastar!

Bárimiz bir el bolyp Jańa jyldy qarsy alyp otyrmyz. Barshamyz eski jyldy oı eleginen ótkizemiz, aldaǵy jylǵa jospar jasap, jańa maqsat qoıamyz. Biz osy sátte bir-birimizge aq tilegimizdi arnaımyz, syı-qurmet kórsetemiz. Qasıetti Otanymyzdyń berekeli birligi jurtymyzdyń osyndaı tatý tirliginen bastalady.

2023 jyl Qazaqstan úshin tabysy men taýqymeti qatar kelgen jyl boldy. Ómirde qýanysh pen qıyndyqtyń alma-kezek bolýy – zańdylyq. Biraq biz eńsemizdi tik ustap, keleshekke árdaıym senimmen qaraımyz.

Bıyl jurtymyz Jańa jyldy kópten kútken jaǵymdy jańalyqpen qarsy alýda. Jaqynda halqymyzdyń sany 20 mıllıonǵa jetti. Elimiz úshin bul aq túıeniń qarny jarylǵan kún boldy. Halyq sanynyń ósýi – myqty memleket bolýdyń jáne órkendeýdiń kepili. Al baqytty otbasy – baqýatty eldiń arqaýy.

Qazaqstan strategııalyq baǵdary aıqyn el retinde turaqty damyp kele jatyr. Biz yntymaq-birliktiń jáne qajyrly eńbektiń arqasynda aýqymdy is-sharalar atqardyq. Jańarý men jańǵyrý jolyndaǵy mańyzdy reformalardy júzege asyrdyq. Osylaısha, memlekettigimizdiń tuǵyryn bekemdeı tústik.

Zań men Tártip ústemdigin ornatýdy memlekettik saıasattyń negizgi baǵdary dep jarııaladyq. Osy baǵytta naqty sharalardy qabyldaýǵa kiristik. Bilim berý jáne densaýlyq saqtaý salasynda aýqymdy jobalardy qolǵa aldyq. Ádildikke negizdelgen jańa ekonomıkalyq úlgige kóshe bastadyq. ıAǵnı, halyqtyń turmys sapasyn jaqsartý úshin asa mańyzdy qadam jasadyq.

Shetelden mıllıardtaǵan dollar ınvestıtsııa tarttyq. Sonyń arqasynda elimizge asa qajet óndirister ashyldy. Jumys oryndary paıda boldy. El ekonomıkasynyń basty qozǵaýshy kúshi retinde shaǵyn jáne orta bızneske jan-jaqty qoldaý kórsetetin boldyq.

Zańsyz alynǵan ekonomıkalyq aktıvterdi elge qaıtarý jumysy jalǵasýda. Memleketke qaıtarylǵan qarjy kóp uzamaı halyqtyń ıgiligine jumsalatyn boldy, ıaǵnı mektepter salyna bastady. Jyldar boıy ıgerilmeı kelgen mıllıondaǵan gektar jer adal sharýalarǵa beriletin boldy.

Jumysshylardyń, ınjenerlerdiń jáne sharýalardyń eseli eńbegi, áskerıler men quqyq qorǵaý organdary qyzmetkerleriniń qasterli Otanymyzǵa qaltqysyz qyzmeti, kásipkerlerdiń tabysty jobalary, mádenıet qaıratkerleriniń shyǵarmashylyǵy jáne ǵalymdardyń elge paıdaly zertteýleri arqyly ultymyzdyń jasampazdyq áleýeti arta tústi. Óz kásibin minsiz atqaryp júrgen muǵalimder, medıtsına qyzmetkerleri jáne basqa da eńbek adamdary – búgingi kúnniń naǵyz batyrlary.

Volonterler, metsenattar, qutqarýshylar jáne ózge de janashyr azamattar ıgi ister jasap, jankeshti erlik kórsetip, tilektestik pen qamqorlyqtyń ozyq úlgisin tanytty. Biz jańa qoǵamdyq etıkany qalyptastyrý, eńbekqorlyq pen bilimpazdyqty dáripteý jáne kreatıvti ekonomıkany damytý úshin kóptegen mańyzdy jumysty qolǵa aldyq.

Elimizde kásibı sportpen qatar, buqaralyq sport qarqyndy damýda. Ásirese, balalar dene shynyqtyrýmen belsendi aınalysatyn boldy. Sol sebepti memleket aýyldyq jáne qalalyq jerlerde jańa sport nysandaryn salyp jatyr.

Qazaqstan uzaq merzimge arnalǵan ulttyq múddesine saı keletin salıqaly syrtqy saıasat júrgizip, halyqaralyq arenadaǵy bedelin arttyra tústi. Bir sózben aıtqanda, osy jyl bizdiń elimiz úshin mol tabysqa, jarqyn sátterge jáne mańyzdy oqıǵalarǵa toly boldy. Jalpy, ekonomıkamyz 4,9 paıyzǵa ósti. Tutas jurt bolyp kóptegen ózekti máseleni sheshe bastadyq. Osylaısha, elimizdiń damýyna tyń serpin berdik.

Eń bastysy, biz jalpyǵa birdeı múmkindik beretin Ádiletti Qazaqstandy qurýǵa kiristik. Júrgizilgen reformalar óz jemisin bere bastady. Bul – bárimizge ortaq is. Sondyqtan men osy mańyzdy jumysqa atsalysqan barsha azamatqa alǵys aıtamyn.

Jańa jyl – árdaıym jańa mindetter júkteletin, jańa syn-qaterlerdi eńseretin kezeń. Biz kelesi jyly ulttyń qaıta órleýiniń kýási bolamyz. Men buǵan kámil senemin. Alaıda básekege qabiletti ári damyǵan el bolý úshin áli de kóp ter tógýimiz qajet.

Jańa jylda memlekettigimizdi nyǵaıtý jáne halyqtyń ál-aýqatyn arttyrý jolyndaǵy júıeli reformalar jalǵasyn tabady. Biz zań men tártiptiń ústemdigin ornyqtyrý úshin keshendi sharalar qabyldaımyz. Memleket tarapynan ónerkásipti, aýyl sharýashylyǵyn, energetıka jáne ekonomıkanyń basqa da salalaryn órkendetýdi kózdeıtin tyń bastamalar qolǵa alynady. Biz áleýmettik jaǵdaıy tómen, kómekke muqtaj jandarǵa árdaıym qamqor bolamyz. Muǵalim, dáriger, qutqarýshy, áskerı qyzmetshi, tártip saqshysy jáne basqa da kásip ıelerine qoldaý kórsetemiz.

Biz jas urpaqtyń jarqyn bolashaǵyna jol ashatyn mańyzdy sheshimder qabyldap jatyrmyz. Jaqynda Ulttyq qordaǵy qarjynyń bir bóligi balalardyń esepshotyna túse bastaıdy. Elimizdiń jastary bolashaqqa nyq senimmen qaraýy kerek.

Kelesi jyly ultymyzdyń tarıhyna baılanysty birqatar is-shara ótkiziledi. Halqymyzdyń tulǵalaryn este saqtap, olardyń eńbegin dáripteý – urpaq paryzy.

Sondaı-aq aldaǵy jyly elimizde Dúnıejúzilik kóshpendiler oıyny ótedi. Sportshylarymyz Jazǵy olımpıadaǵa qatysady. Túptep kelgende, ár azamat óz salasynyń naǵyz mamany bolýy kerek. Sonda ǵana Otanymyz ósip-órkendeıdi.

Biz árbir tańǵa úmit artamyz, árbir jyldan jaqsylyq kútemiz. Al úmittiń aqtalýy, arman-maqsattyń oryndalýy ózimizge baılanysty. Eń bastysy, elimizdegi tatýlyqty, tynyshtyq pen turaqtylyqty baǵalaıyq. Birligi myqty eldiń rýhy bıik bolady. Uly Abaı aıtqandaı, birlik degenimiz – eń aldymen, aqylǵa – birlik. Memlekettigimizdi saqtaý úshin aýyzbirshiligimizdi saqtaıyq. Qasterli Otanymyzdy kórkeıtemiz desek, tabandy eńbek eteıik.

Damyǵan memleket bolý úshin ozyq bilimge umtylyp, jańa tehnologııany, sonyń ishinde jasandy ıntellektini ıgerýimiz qajet. Árdaıym bir-birimizge qamqor bolaıyq. Úlkenge – qurmet, kishige – izet kórseteıik. Balalarymyzdyń tárbıesine basa mán bereıik. Úlgi-ónege bolyp, ulaǵatty urpaq ósireıik.

Táýelsizdik urpaqtary jaqsy qasıetterdi boıyna sińirip ósip keledi. Olar ónerde, sportta, ǵylymda jáne bızneste zor tabysqa jetýde. Biz jastarymyzdyń osyndaı myqty, adal azamat bolǵanyn maqtan tutamyz. Qazaqstannyń bolashaǵy – otanshyl, bilimdi, eńbekqor azamattardyń, ıaǵnı jastardyń qolynda. Men jas urpaqtyń jasampazdyq qýatyna senemin!

Biz – bárimiz tek bolashaqqa, tek alǵa umtylatyn memleket bolýymyz kerek. Biz bir el bolyp biriksek, kez kelgen belesti baǵyndyramyz. Eń bastysy, elimiz tynysh, irgemiz bútin bolsyn!

Jańa jylǵa deıin sanaýly sekýndtar qaldy. Tabaldyryqtan attaǵaly turǵan jyl bárimiz úshin jetistikterge toly bolsyn!

Sonymen qatar búgin Jańa jyldyń qarsańynda jumys istep jatqan adamdarǵa arnaıy quttyqtaýymdy joldaımyn. Sizder elimizge adal qyzmet etip júrsizder. Men barshańyzǵa shynaıy rızashylyǵymdy bildiremin.

Jańa jyl ár shańyraqqa, ár azamatqa qýanysh pen shattyq ákelsin!

Úlkenderimiz aman bolsyn!

Balalardyń armany oryndalsyn!

Eńbekterińiz jemisti bolsyn!

Tórt qubylamyz túgel bolsyn!

Kók týymyz máńgi jelbiresin!

Ánuranymyz shyrqala bersin!

Jańa jyl qutty bolsyn, aǵaıyn!