Qasym-Jomart Toqaev qazaqstandyqtardy Respýblıka kúnimen quttyqtady
Memleket basshysy Qasym-Jomart Toqaev el turǵyndaryn Respýblıka kúnimen quttyqtady, dep habarlaıdy Kazinform Aqordanyń baspasóz qyzmetine silteme jasap.
Memleket basshysy Qasym-Jomart Toqaevtyń Respýblıka kúnimen quttyqtaýy
Qurmetti otandastar!
Barshańyzdy ulttyq merekemiz – Respýblıka kúnimen shyn júrekten quttyqtaımyn!
Qazaqstannyń tarıhı tańdaýyn aıqyndaǵan Egemendik deklaratsııasy – eldigimizdiń berik tuǵyry. Onda memleketimizdiń aýmaqtyq tutastyǵynyń myzǵymastyǵy, halqymyzdyń jalpyulttyq biregeıligin nyǵaıtýǵa umtylysy jáne azamattarymyzdyń quqyqtary men bostandyqtaryna kepildik beriletindigi naqty kórinis tapqan. Osy basty qaǵıdattar Konstıtýtsııamyzda, zańdarda jáne Qazaqstannyń strategııalyq baǵyt-baǵdaryn belgileıtin basqa da qujattarda kórsetilgen.
Respýblıka kúni yrysty yntymaq pen ózara tileýlestiktiń arqasynda halqymyzdyń barlyq syn-qaterden súrinbeı ótip, azattyqqa jetkenin áıgileıdi. Biz babalar amanatyna adal bolamyz. El birligin árdaıym nyǵaıta beremiz. Egemendigimizdi qadir tutyp, kózdiń qarashyǵyndaı saqtaımyz.
Halqymyz tatý-tátti ári berekeli qoǵam qurýǵa bar erik-jigerin jumsaıdy, jasampaz isimen jańa belesterdi baǵyndyrady. Árbir otandasymyz Adal azamat degen atqa laıyq bolyp, elimizdi damytýǵa salmaqty sózimen, ónegeli isimen úles qosady.
Biz birge maqsatymyzǵa jetemiz – barshaǵa birdeı múmkindik beretin Ádiletti Qazaqstandy quramyz.
Baıraǵymyz kók aspanda asqaq jelbiresin!
Ulttyń rýhy qashanda bıik bolsyn!
Elimiz ósip-órkendeı bersin!
Sizderge zor densaýlyq, baq-bereke jáne tolaǵaı tabys tileımin!
